पोखरा । नेपाली कांग्रेस कास्की क्षेत्र नं. २ को क्षेत्रीय सहसचिव पदमा प्रकाश कोइराला निर्वाचित भएका छन् ।
पोखरा महानगरपालिका वडा नं. ४ को वडा सदस्यमा अत्यधिक मतसहित निर्वाचित भई स्थानीय तहमा जनप्रतिनिधिका रूपमा काम गर्दै आएका कोइराला कांग्रेसको क्षेत्रीय सहसचिवमा निर्वाचित भएका हुन् ।
काेइरलाले २ सय २९ मत पाउँदा इन्द्र बहादुर खत्रीले १ सय ५१ र राजेश गाैतम गाैतमले ९५ मत मात्रै पाएका छन् ।
स्थानीय तहकाे निर्वाचनकाे भारी मतलाई नै निरन्तरता दिदै आन्तरिक चुनावमा पनि विजयी भएका छन् ।
स्थानीय जनप्रतिनिधिका रूपमा जनतासँग प्रत्यक्ष जोडिएर काम गर्दा हासिल गरेको अनुभवलाई पार्टी संगठन सुदृढीकरणमा उपयोग गर्ने प्रतिबद्धता सहित कोइरालाले क्षेत्रीय सहसचिव पदमा उम्मेदवारी दिएका थिए । निर्वाचनबाट प्राप्त जिम्मेवारीले आफूलाई थप उत्साहित बनाएको उनले बताएका छन्।
युवालाई अवसर, उद्यमशीलतालाई प्रोत्साहन तथा स्थानीय अर्थतन्त्रलाई मजबुत बनाउने अभियानलाई कोइरालाले आफ्नो प्रमुख एजेन्डाका रूपमा अघि सारेका छन्। साथै उनले नेपाली कांग्रेसलाई समयसापेक्ष, गतिशील र ऊर्जावान संगठनका रूपमा अघि बढाउन तथा पार्टीमा युवाहरूको सक्रिय सहभागिता बढाउन भूमिका खेल्ने प्रतिबद्धता व्यक्त गरेका छन् ।
वडा सदस्यका रूपमा स्थानीयस्तरमा काम गरेको अनुभवलाई पार्टी संगठनसँग जोड्दै जनताका समस्या, युवा पुस्ताका आवश्यकता तथा स्थानीय आर्थिक विकासका सवाललाई पार्टीको नीति र संगठनसँग जोडेर अघि बढाउने उनको भनाइ छ।
क्षेत्रीय सहसचिवमा निर्वाचित भएपछि कोइरालाले आफूलाई विश्वास गरी मतदान गर्ने क्षेत्रीय प्रतिनिधि तथा शुभेच्छुकप्रति धन्यवाद व्यक्त गर्दै आगामी दिनमा पार्टी संगठनलाई थप मजबुत बनाउन सक्रिय भएर काम गर्ने प्रतिबद्धता जनाएका छन्।
प्रतिक्रिया लेख्नुहोस्:-