पोखरा / पोखरा–बागलुङ सडकखण्डअन्तर्गत कास्कीको अन्नपूर्ण गाउँपालिका–१ घट्टेखोलामा दुई दिन लगातार सुख्खा पहिरो खसेपछि अवरुद्ध सडक एकतर्फी सञ्चालनमा आएको छ। कात्तिक २२ र २३ गते लगातार पहिरो खस्दा सडक अवरुद्ध भएको थियो।
कात्तिक २२ गते बिहान करिब ९:०५ बजे सडक माथिबाट सुख्खा पहिरो खसेपछि सडकको दुवैतर्फ यातायात अवरुद्ध भएको थियो। पहिरो खसेको सूचना पाएपछि प्रहरी चौकी नौडाँडाबाट प्रहरी सहायक निरीक्षक विष्णुकुमार मानन्धरको कमाण्डमा तीन जना र वडा प्रहरी कार्यालय बगरबाट प्रहरी निरीक्षक रामप्रसाद सापकोटाको कमाण्डमा ट्राफिक प्रहरीसहित सात जनाको टोली त्यसतर्फ पुगेको थियो।
प्रहरी, स्थानीयवासी, जनप्रतिनिधि तथा सम्बन्धित निकायको समन्वयमा सडक खुलाउने प्रयासपछि सोही दिन बिहान १०:५५ बजे एकतर्फी र दिउँसो २:३० बजे दुवैतर्फी यातायात सञ्चालनमा आएको थियो।
तर, कात्तिक २३ गते दिउँसो ३ बजे पुनः सोही स्थानमा सुख्खा पहिरो खसेपछि सडक पूर्ण रूपमा अवरुद्ध भएको थियो। त्यसपछि वडा प्रहरी कार्यालय बगरबाट प्रहरी निरीक्षक सापकोटाको कमाण्डमा ट्राफिक प्रहरीसहित नौ जनाको टोली घटनास्थलमा खटिएको थियो।
प्रहरीका अनुसार पुनः पहिरो खसेर अवरुद्ध भएको सडक सोही दिन साँझ ५:३५ बजे एकतर्फी सञ्चालनमा आएको छ। सडक खुलाउन प्रहरी र सम्बन्धित निकायले समन्वय गरेका थिए।
घट्टेखोला वडा प्रहरी कार्यालय बगरबाट करिब ११ किलोमिटर पश्चिममा पर्छ।
प्रतिक्रिया लेख्नुहोस्:-