चुनाबमा आफ्नो टोल छाडेर अन्त गए असहयोग गरेको ठहरिने छ : गगन थापा

नेपाली कांग्रेसका महामन्त्री गगन थापाले बैशाख ३० गते हुने स्थानीय निर्वाचनमा कुनैपनि नेता तथा कार्यकर्ताले आफ्नो टोल छाडेर अन्त गए असहयो गरेको ठहरीने बताउनुभएको छ ।
महामन्त्री थापाले कास्कीको मादी गाउँपालिकाको आयोजनामा भएको अगुवा तथा कार्यकता भेला कार्यक्रमको सम्बोधनको क्रममा बोल्दै पार्टीले अब प्रत्येक वडामा टोल कमिटि समेत गठन गरि चुनाव प्रचार प्रसारमा टोल भन्दा बाहिर गएको खण्डमा समेत चुनावमा असहयोग गरेको हुने बताउनुभएको हो । उहाँले पार्टीलाई आगामी निर्वाचनमा बलियो बनाउन टोलस्तरबाट नै नेताहरु खटिनुपर्नेमा जोड दिनुभयो ।
कम्युनिष्टहरुले विभिन्न झुटा कुरा फैलाएपनि बैशाख ३० मै निर्वाचन हुने उहाँले बताउनुभयो ।
थापाले केन्द्रदेखी स्थानीय तहसम्मका सम्पुर्ण नेताहरुलाई समेत वडा स्तरको कमिटिमा बसेर काम गर्न अनुरोध गर्नुभयो ।
कांग्रेसमा सानो क्षेत्रलाई वेवास्ता गर्दा चुनावको नतिजामा ठुलो परिर्वतन आएका कारण विशेष योजनाका साथ चुनावमा हुम्मिने तयारी भइरहेको बताउनुभयो ।
‘हामी यसपालिको स्थानीय चुनाव कसरी लड्न चाहान्छौ भने साथीहरु आफ्नो टोल छाडेर कोहिपनि बाहिर नजानु । जति ठुलो मान्छे होस् म कांग्रेसको महामन्त्री भएभन्दैमा मेरो पनि त एउटा टोल हुन्छ’ उहाँले भन्नुभयो,‘ शुक्रराज दाई, यज्ञ दाई, किशोर दाईको पनि त आफ्नै टोल छ । त्यो टोल छाडेर नजानुुस् आफ्नो टोल पहिला सम्हाल्नुहोस् । आफ्नो टोल वा वडा छाडेमा कांग्रेसलाई असहयोग गरेको मानिने छ ।’
उहाँले मोटरसाइकल, गाडी लिएर तेल हाली बजार बजार डुल्दैमा पार्टीका लागि खटिएको नहुने बताउनुभयो । पार्टीका लागि खट्नुभनेको टोलमै बसेर मतदाताको नामावाली निकाली मतको अनुमान लगाउँने र सोही अनुसार लाग्नु वास्तविक खटिएको हुने बताउनुभयो ।
‘महेन्द्रपुलमा जम्मा भएर गुनगुन गरेर बसेर हुदैँन । तलै बस्ने हो तल बसेर नै गर्ने हो मैले सभापतिलाई पनि आग्रह गरिसके । माथिल्लो पदका पनि तल बसेर काम गर्ने तल बसेर सम्वाद गर्दा मर्यादा घट्दैन’ उहाँले थप्नुभयो,‘ क्षेत्रीय प्रतिनीधि हुनुभएको छ ,वहाँहरुले सानदार ढंगले महाधिवेशन गराउनुभयो । अब स्थानीय निर्वाचनमा सानदार तरिकाले जिताउन लाग्नुहोस् । सबैले टोलको संयोजक भएर काम गर्नुस काम गर्दा सानो भइदैँन । पार्टीको एकसेएक नेताहरुले पनि तल बसेरै काम गर्नुपर्छ ।’ पार्टीमा एकता भए कास्कीमा चारतारे झण्डा गाड्न सक्नेमा कुनै दुईमत नरहेको उहाँले दाबी गर्नुभयो ।

कास्कीको हकमा पोखरा महानगरको उम्मेदवार केन्द्रले छान्ने र अन्य पालिकाको उम्मेदवार जिल्लाले नै मिलाउनुपर्ने छ । ‘महानगरको टुंगो केन्द्रबाट गरेर पठाउँछौँ । अन्य गाउँपालिकाको तपाईँहरु नै बसेर मिलाउनुपर्छ । महानगरमा हामी तपाईहरुले चाहे जस्तो गरेर नै पठाउँछौ । तालमेल गर्ने की नगर्ने हामी माथिबाट मिलाउदैनौ तपाईँहरु आफै मिलाउनु होस् ।’
अघिल्लो निर्वाचनमा जनताले कांग्रेसलाई प्रतिपक्षीमै बस्न अनुरोध गर्दा पुर्ण इमान्दारका साथ प्रतिपक्षीमा बसेर काम गर्दा समेत देश चलाउनका लागि कांग्रेस नै सरकारमा आउनुपरेको स्मरण गर्दै थापाले कांग्रेस जात नै सबैलाई मिलाउने रहेको बताउनुभयो ।
कांग्रेसले अहिले प्रत्येक सय जनामा १५/२० जनाको मत मात्रै पाउने गरेको छ । अब कांगे्रेसले प्रत्येक सय जनामा ४४/४५ जना मतदाताले मत हाल्ने नबनाएसम्म नेपाली कांग्रेस बलियो नहुने र अहिले बाध्यताले सरकार चलाउन परिरहेका छ उहाँले बताउनुभयो ।
एमसीसीको बारेमा बोल्दै थापाले कम्युनिष्टहरुले जनतालाई गलत कुरा बताउँदै आइरहेको सुनाउनुभयो । उहाँले नेपाल किसान पार्टी बाहेक सबै दल एमसीसी ल्याउनेमा पहिले देखि नै लागिपरेको सुनाउँदै एमसीसी अमेरिकी सेना आउने नभई विश्वका विकसित राष्ट्रले अविकसित राष्ट्रलाई दिने अनुदान मात्रै रहेको स्पष्ट पार्नुभयो ।