पोखरा, १८ वैशाख । जिल्ला अदालत कास्कीमा अंश, घरेलु हिंसा र मानाचामल सम्बन्धी मुद्दा विचाराधीन रहेकै अवस्थामा एक जघन्य आपराधिक घटना सतहमा आएको छ। व्यक्तिगत प्रतिशोध साँध्न र आर्थिक लाभ लिने उद्देश्यले सुरु गरिएको यो ठगी प्रकरणमा अहिले प्रहरीले गम्भीर अनुसन्धान अघि बढाएको छ।
पोखरा महानगरपालिका–७ शान्तिनगरचोककी कञ्चन सेडाईलाई फसाउने नियतले विभिन्न व्यक्तिलाई चेक बाँडिएको र झुठो लेनदेनको दाबी गरिएको पुष्टि भएपछि घटनाले नयाँ मोड लिएको छ। यस प्रकरणमा संलग्न रहेको आशंकामा राजु सुनारलाई प्रहरीले नियन्त्रणमा लिई अनुसन्धान सुरु गरिसकेको छ।
पीडित कञ्चन सेडाईले आफ्ना श्रीमान् अनुप घर्ती जिसीले नै घरबाट चेकबुक चोरेर किर्ते हस्ताक्षरमार्फत आफूलाई फसाउने उद्देश्यले विभिन्न व्यक्तिलाई चेक वितरण गरेको प्रमाणसहित खुलासा गरेकी छिन्। घटनाको विवरणअनुसार २०८२ मंसिर १६ गते र त्यसअघि पनि पटक–पटक कञ्चन घरमा नभएको मौका छोपी अनुपले दराज तोडेर प्राइम कमर्सियल बैंक, सांग्रिला डेभलपमेन्ट बैंक र नबिल बैंकका तीनवटा चेकबुक, सुनका गरगहना र नगद चोरी गरेको दाबी गरिएको छ।
एक आफन्तबाट आफ्नो नामको चेक किर्ते हस्ताक्षरसहित विभिन्न व्यक्तिलाई दिइएको र रकम भराउन खोजिएको सूचना पाएपछि मात्र आफूले तत्काल बैंक खाता रोक्का गरी प्रहरीमा उजुरी दिएको कञ्चनले बताइन्। सोही उजुरीका आधारमा चेकमा रकम भरेर वार्गेनिङ गर्न खोज्ने सुनारलाई प्रहरीले पक्राउ गरी हाल तारेखमा राखेको छ।
चोरिएका चेकहरूलाई अवैध ढुकुटी र मिटरब्याजी कारोबारमा प्रयोग गरी अदालतमा मुद्दा दर्ता गराउने र त्यसैको आडमा पीडित सेढाईलाई फसाउने अनुपको योजना रहेको देखिन्छ। प्रहरीले पटक–पटक सम्पर्क गर्न खोज्दा समेत अनुप सम्पर्कविहीन बनेका छन्, जसले उनको संलग्नतालाई थप शंकास्पद बनाएको छ।
यस आपराधिक गिरोहमा अनुपको परिवारका सदस्यहरू पूर्वशिक्षक झपटबहादुर, आमा मिठुकुमारी, दाइ अपार र बहिनी अमृताको समेत संलग्नता रहेको र उनीहरूमाथि पनि कानुनी कारबाही हुनुपर्ने आवाज उठिरहेको छ। अनुसन्धानका क्रममा बाहिरिएको एक कल रेकर्डमा अनुपले चेक लिने व्यक्ति राजु सुनारलाई ‘मैले भनेको बुझेको होला, मैले भने झैं गर्नु भन्दैं प्रहरी वा अदालतमा के भन्ने र कसरी बोल्ने’ भन्दै निर्देशन दिइरहेको र ‘चेक बाउन्स वा पैसा नदिएको विषयमा प्रहरी चौंकीमा किन आईनस् भने आफू अदालतबाट लेनदेनको मुद्दामा अघि बढ्ने भन्नु’ भन्दै आश्वस्त पारिरहेको सुन्न सकिन्छ।
यसरी चेक चोरी भएको थाहा पाए लगत्तै कञ्चन सेडाईले सम्बन्धित बैंकहरुमा खाता रोक्का गर्नुका साथैं, प्रहरी प्रशासनमा निवेदन र जानकारी दिएकी थिईन् । त्यसैगरी सार्वजनिक रुपमा नैं आदर्श समाज राष्ट्रिय दैनिकमा सूचना प्रकाशित गरी सर्वसाधारणलाई सचेत गराउँदैं त्यस्तो चेक दिएमा वा कसैलाई ठगीमा सोमल गराउन अनुरोध गरेमा तत्कालै प्रहरीमा खबरगरिदिन पनि अनुरोध गरेकी थिइन्।
कानुनी विज्ञहरूका अनुसार यस्ता मिटरब्याजी कारोबारी र ठगहरूले बैंकिङ प्रणालीको दुरुपयोग गर्दै ‘काउन्टर बाउन्स’ गराउने र अदालतमा लेनदेनको मुद्दा दायर गरी पीडितलाई फसाउने गरेको पाइन्छ। ठगीको यस्तो गिरोहले अदालतमा मुद्दा दायर गर्दा प्रायः मिति र बार खुलाउन सक्दैनन्, जुन उनीहरूको कमजोर पक्ष हो।
यदि पीडितले फरेन्सिक परीक्षणको माग गरेमा चेकमा गरिएको हस्ताक्षर, मसीको प्रकृति र चेक काटिएको समयसम्बन्धी वैज्ञानिक तथ्यहरू सहजै खुल्ने गर्दछन्। फरेन्सिक ल्याबको परीक्षणबाट चेक चोरी भएको समयभन्दा पछि चेक काटिएको र दाबी गरिएको आर्थिक कारोबारको कुनै स्रोत नभएको तथ्य पुष्टि भएसँगै यस्ता जालसाजपूर्ण मुद्दा स्वतः खारेज हुने र उल्टै ठगीमा मुद्दा दर्ता हुने सम्भावना बलियो रहन्छ।
यस प्रकरणमा जोडिएका मुख्य योजनाकार अनुप घर्ती जिसीको विगत समेत आपराधिक रहेको पाइएको छ। उनी यसअघि नै घरमा भाडामा बस्ने १७ वर्षीया युवतीमाथि यौनहिंसा र अभद्र व्यवहार गरेको आरोपमा पक्राउ परी धरौटीमा छुटेका व्यक्ति हुन्। त्यसैगरी, चेक लिएर दाबी गर्ने राजु सुनार पनि विगतमा चोरीका सुनका गहना किनबेचको अभियोगमा जेल सजाय भोगिसकेका व्यक्ति हुन्। अनुपको परिवार नै मिटरब्याज, ढुकुटी र अवैध सुनको कारोबारमा सक्रिय रहेको पाइएपछि स्थानीय स्तरमा सुरक्षाको चिन्ता थपिएको छ।
पीडित कञ्चन सेडाईले यी चोरिएका चेकहरू फिर्ता नगरे र दोषीमाथि कारबाही नभए थप कानुनी संघर्ष गर्ने चेतावनी दिएकी छिन्। उनले यसलाई केवल बैंकिङ कसुर मात्र नभई चोरी, किर्ते र संगठित ठगीको रूपमा व्याख्या गरेकी छिन्। जिल्ला प्रहरी कार्यालय कास्कीले हाल उक्त जाहेरीका आधारमा अनुसन्धान प्रक्रियालाई तीव्रता दिएको छ।
पटक–पटकका हिंसात्मक घटना र यस्ता आपराधिक क्रियाकलापले गर्दा निर्दोष व्यक्तिको ज्यानसमेत जोखिममा पर्न सक्ने भन्दै स्थानीयले प्रहरी प्रशासनसँग कठोर कदम चाल्न माग गरेका छन्। प्रहरीले समयमै यस्ता किर्ते र ठगीका घटनाको जरोसम्म पुगेर कारबाही नगर्ने हो भने, अंश मुद्दाको आवरणमा निर्दोष व्यक्तिले अनाहकमा प्राण गुमाउनुपर्ने अवस्था नआउला भन्न सकिँदैन।
प्रतिक्रिया लेख्नुहोस्:-