विजय नेपाली
पोखरा । पोखरा महानगरपालिका वडा २३ मा यतिबेला चुनावी रौनक चलिरहेको छ । विभिन्न पार्टी, स्वतन्त्र उम्मेदवारले घरदैलो तथा चुनावी सभा गरिरहेका छन् ।
त्यहि चुनावी सभा र घरदैलोमा आफ्नो वडामा कालो पिच बाटो आउँछ की भन्ने आशमा छन् वडावासीहरु । त्यति आशा बुन्दै बसेकी छिन् लोकमाया पराजुली ।
उमेरले नेटो काटि सक्यो सबै छाला चाउरी परि सके कपाल सबै फुली सके तर, अनुहारमा केहि आशाका किरण लिएर बसेकी छिन् ७० वर्षर्की उनै लोकमाया ।
पाँच वर्ष अघि पोखरा महानगरको वडा भएकोमा उनी निकै मख्ख परिन् । उनको एउटै स्वार्थ थियो अनि अरुले झै मत हालिन् । तर, उनको मत खेर गयो । जे आशा बोकेर मत हालेकी हुन त्यो आशा पुरा हुन् सकेन् ।
जवानीले नेटो काटेर उमेरको आयु घट्दासमेत उनले आफ्नो वडामा कालोपत्रे र पिच बाटो देख्न पाएकी छैनीन् । उनी जस्तै सेतो कपाल लिएर बसेकी छिन लिलादेवी पराजुली ।
उमेरले एकै रहेका उनीहरु अहिले फेरी एक पटक कालो बाटो देख्न पाइन्छ की भन्ने आशामा बसिरहेका छन् र कुरिरहेका छन् बैशाख ३० गतेलाई ।
वि. सं. २०७३ फाल्गुन २७ गते महानगरपालिका घोषणा भएसंंगै पोखरा महानगरपालिकाको क्षेत्रफल ४६४.२४ वर्ग कि. मी. हुन पुग्यो ।
पोखरा उप–महानगरपालिका, लेखनाथ नगरपालिका, मौजा, चापाकोट, भदौरे तमानी (३,९ ), कास्कीकोट माझठाना ( १,४,९ ) कालिका ( १,५ ) र पुरन्चौर गा.वि.स. एक भई महानगर बनेको हो ।
पोखरा महानगरपालिकाको पूर्वी सिमानामा मादी र रुपा गाउँपालिका, पश्चिममा अन्नपूर्ण गाउँपालिका पर्वत र स्याङ्जा जिल्ला रहेको छ उत्तरी सिमानामा माछापुच्छ्रे र मादी गाउँपालिका तथा दक्षिणमा स्याङ्जा र तनहु जिल्ला रहेको छ ।
वडा २३ भने चापाकोट (१–९) र भदौरे तमागी (३–९) मिलेर बनेको हो । हाल वडा नं. २३ को क्षेत्रफल ४७.८ वर्ग किलोमिटर रहेको छ ।
महानगर बनेको उक्त क्षेत्रमा अहिलेसम्म १ इन्चबाटो पनि पिच हुन सकेको छैन् ।
जुन आशाले वडा बनाउन मत दिएर जनप्रतिनीधि बनाए उनीहरुले उक्त क्षेत्रलाई पिच बनाउन सकेनन् । वडा २३ वासीको एकै चाहाना छ हिउँदमा सडक धुलो नहोस्, बर्खामा हिलो न होस् । होस त केबल कालो र चिल्लो । उनीहरुको उमेर ढल्कियो ढल्किएन सडक कालोपत्रे हुने आश ।
लोकमाया भन्छिन् ‘मर्नु अघि घर अगाडीको बाटो पिच भएको देख्न मन छ । उमेर सकिनै लाग्यो पोखरामा (बजार ) मा मात्रै कालो पिच देखियो ’उनले भनिन्,‘अझैपनि आस लागिरहेको छ र यो पालिपनि काम गर्ने व्यक्ति हेरेर मत दिनेछौँ ।’
९ वर्षको उमेरमा उनका विवाह भएको थियो उनको नातीनातिना पनि ठुला भइसके उनीहरु बजारमै बस्छन् तर लोकमाया भने सबैलाई एकै कुरा भन्ने गर्छिन्,‘अब तपाईँहरुले कालो बाटोमा हिडाउनुहुन्छ की भन्ने लागेको छ’ उम्मेदवारहरु भने आस्वासन दिइरहन्छन् ।
उक्त क्षेत्रबाट महादेव गुरुङ, राजिव पहारी लगायत थुप्रै व्यक्तिहरु सांसद तथा मन्त्री भएका छन् ।‘कालोबाटो पोखरामा मात्र देखेँ । यहाँ भएको छैन सारै मनमा दुःख लाग्छ ।
त्यो बेला पनि निकै सास्ती खेप्यौँ यो पाँच वर्षमा हुन्छ की भन्ने लागेको थियो त्यो नि पुरा भएन ।’ ठुलाखेत चापाकोटकी लिलादेवीले पनि नेताहरुले गारेटो बनाएर सद्यैँ भोट माग्न आउने तर पिच सडक दिने कुरामा भने वेवास्ता गर्ने गरेको सुनाईन् ।
सबैको झै सररर् कालोबाटो गएको देख्न पाए हुनेथियो । विहान हिडेर जताततै हिडेर पनि आइयो । फाँट फाटै पोखरा पुगेर आइयो अहिले धुलो खाएपनि हिलो खाएपनि त्यहि सडक हो बाचुन्जेल कालो बाटो देख्न पाए पुग्थ्यो ।’
७० वर्षकी शोभा पौडेलले आफ्नो वडाको विकास भएको देख्न चाहान्छिन् । ‘मेरो बुढोले पाँच वर्षसम्म खपौदीमा बसेर बाटो खनेको हो । अहिले वहाँको स्वर्गवास भइसक्यो तर, मेरो बुढाको सपना पुरा हुन सकिरहेको छैन् ’ उनले भनिन्,‘हामीलाई बाटाको सुविधा त अलिकतिभएपनि भयो उमेर पनि भइसक्यो कतिनै बाचुम्ला यहि धुलोको पिर हो ।’
उनीहरु कसैलाईपनि नकरात्मक तरिकाले हेरिरहेका छैनन् । जो आएपनि जिताउने तरखरमा उनीहरु छन् । त्यहि सोझोपनको फाइदा भने त्यहाँका नेताहरुले उठाइरहेका छन् ।
भौगोलिक रुपमा महानगरभित्र परेपनि त्यो ठाउँको सडक विकट गाउँको भन्दा पनि दुःखदायी छ । वडा २३ अहिलेसम्म पिच सडक नपुगेको एक मात्र वडा हो । वडा २३ मा मात्र नभई पोखरा महानगरभित्र ६ सय ४१ किलोमिटर सडक अलिहे पनि धुलाम्मे अवस्थामा रहेका छन् ।
दलहरुले निकै उत्कृष्ट घोषणापत्र समेत तयार गरेका छन् र यो क्रम अहिलेको होइन् देशमा निर्वाचन हुने समयदेखीको हो । यो क्रम निरन्तरता चलिरहन्छ ।
नेताहरुले ठुला भाषण दिन्छ तर दिदैनन् जनतालाई सेवा । सवारी गुड्ने सडक त पुग्यो तर अहिलेसम्म सुगम सडक पुग्न सकेको छैन । पाँच वर्ष अघि पोखरा महानगरका हरेक वडामा कालोपत्रे सडक हुने भनिएपछि त्यो पुरा हुन सकेन् ।
(आफ्नो गाउँ ठाउँमा कालो चिल्लो सडक आउँछ की भन्ने आशामा प्रत्येक उम्मेदवार आउँद भाषण सुन्न पुग्ने ६५ काटिसकेका वृद्धा आमाहरु । तस्वीर ः विजय नेपाली )
प्रतिक्रिया लेख्नुहोस्:-