पोखरा । निर्वाचन कार्यालय अगाडि नाराबाजी गरेको आरोपमा जिल्ला प्रहरी कास्कीले सोमबार पोखराका अशोक खड्कालाई पक्राउ गरेको छ ।
मुख्य निर्वाचन अधिकृतको कार्यालय पोखराले पक्राउ गरेर कारवाही अगाडि बढाउन निवेदन गरेकोले आफूहरुले नियन्त्रणमा लिएको जिल्ला प्रहरी कास्कीका प्रवक्ता डिएसपी सुन्दर तिवारीले जानकारी दिए ।
‘मुख्य निर्वाचन अधिकृतको कार्यालयबाट पक्राउ गरी कारवाही गरिपाऊँ भनेर निवेदन आएको थियो । त्यसैको आधारमा अनुसन्धानका लागि नियन्त्रणमा लिएका हौं,’ डिएसपी तिवारीले भने ।
निर्वाचन कसुर तथा सजाय ऐन २०७३ को दफा २० को १ घ अनुसार खड्कालाई नियन्त्रणमा लिइएको उनले जानकारी दिए । उक्त दफाअनुसार उम्मेदवार वा मतदाता वा निजहरुमध्ये कसैको सरोकार वा स्वार्थ भएको कुनै व्यक्ति वा निर्वाचन अधिकृत वा निर्वाचनमा संलग्न कर्मचारीलाई प्रभाव पार्न धाक, धम्की वा डरत्रास देखाउन नहुने उल्लेख छ ।
खड्कालगायत आइतबार अटेरी नामक अभियानका टोलीले पोखराको मेयरमा स्वतन्त्र उम्मेदवारी दिएका खडकबहादुर (गनेस) पौडेलले चुनाव चिन्ह ‘लौरो’ पाउनुपर्ने माग गर्दै नाराबाजी गरेका थिए ।
निर्वाचन आयोगले पौडेललाई आइतबार बिहान लौरो चुनाव चिन्ह दिएको थियो । तर, दिउँसो प्राविधिक त्रुटिका कारण उक्त चिन्ह दिन नमिल्ने भन्दै फिर्ता बोलाएको थियो ।
त्यसपछि आक्रोशित बनेका अटेरी अभियानका अभियानताले मुख्य निर्वाचन अधिकृतको कार्यालयअगाडि नाराबाजी गरेका हुन् ।
चुनाव चिन्ह वर्णानुक्रममा लौरो आठौं नम्बरमा पर्ने तर, पोखरामा मेयर पदका उम्मेदवार ७ जनामात्रै भएकाले लौरो चिन्ह नबाँड्न आयोगले नै परिपत्र जारी गरेको मुख्य निर्वाचन अधिकृत श्रीकृष्ण भट्टराईले जानकारी दिएका थिए ।
तर, अटेरी समूहको नाराबाजीपछि निर्वाचन अधिकृत कार्यालयले अन्तिममा पुनः लौरो चिन्ह नै मेयर प्रत्याशी गनेस पौडेललाई वितरण गरेको थियो ।
प्रतिक्रिया लेख्नुहोस्:-