विजय नेपाली
मनाङले पोखरामा फेरी एकपटक आफ्नै किर्तिमानी भंग गर्दै नयाँ किर्तिमानी रच्नबाट ५ मिनेटको समयमात्र बाकि थियो । पोखरा रंगशाला फुटबल मैदानमा एपिएफ क्लब र मनाङ मस्र्याङदी क्लबबीच फाइनल खेल चलिरहेको थियो ।
एपिएफले खेलको पहिलो हाफमा नै अग्रता लिदैँ अघि बढेपछि खेल १–० मै सकिन्छ की भन्ने एक मन सबैलाई लागेको थियो । तर मनाङ मस्र्याङदी जसका लागि पोखरा सद्यैँ भाग्यमानी ठहर हुँदै आइरहेको छ ।
शनिबार पनि भाग्यमानी सावित हुँदाहुँदै फेरी खेल सकिन लाग्दा त्यो खोसियो । निकै रोमाञ्चक खेलको दोस्रो हाफमा एपिएफ माथि एकाएक हाबी हुँदै पुनरागमन अग्रता लिएको मनाङ निर्धारित समय सकिएलगत्तै थप गरिएको अतिरिक्त समयमा सम्हालिन नसक्दा अन्ततः किर्तिमानी कायम गर्नबाट चुकेको छ ।
७ औँ पटक आहारारा गोल्डकपको उपाधी उचाल्दै सर्वाधिक च्याम्पियनको किर्तिमानी कायमै राख्ने मनाङको यात्रामा एपिएफ बाधक बन्यो । तर बाधा नबनोस पनि कसरी ? एपिएफलाई किर्तिमानी रोक्दै इतिहास रच्न थियो आहारारा गोल्डकपको च्याम्पियन बन्दै ।
सहारा क्लब पोखराको आयोजनामा भएको २० औं आहारारा गोल्डकप फुटबल प्रतियोगिताको दुई दशकको यात्रामा पहिलो पटक एपिएफले आफ्नो नाम लेखाउन सफल भएको छ । निरन्तर दुई दशकको यात्रामा बल्ल च्याम्पियन बनेको हो ।
२०६४ सालको छैटौं आहा गोल्डकपको फाइनलमा पुगेको एपिएफले १४ वर्षपछि आहारारा गोल्डकपको उपाधी उचाल्दै इतिहास रचेको छ । अग्रता लिएर पनि गुमाइसकेको खेललाई बराबरीमा ल्याउँदै पेनाल्टीमा भाग्यमानी सावित हुँदा च्याम्पियनमा आफ्नो नाम लेखाउन सफल भएको हो ।
सर्वोत्कृष्ट खेलाडीको उपाधी एपिएफका राजनलाई
एपिएफका डिफेन्डर राजन गुरुङ २० औं आहारारा गोल्डकप फुटबल प्रतियोगितको सर्वोत्कृष्ट खेलाडी घोषित भएका छन् । उनले अप्रिला स्कुटर प्राप्त गरे । उनले उत्कृष्ट डिफेन्डर समेत चुनिदै नगद २५ हजार रुपैँयाको साथमा ट्रफि हात पारे ।
विधागत पुरस्कार तर्फभने एपिएफको वर्चस्व रह्यो । उत्कृष्ट फरवार्ड मनाङका आफिज ओलावाले घोषित भए । यस्तै एपिएफका रवि थिसिङ उत्कृष्ट मिडफिल्डर र उच्च गोलकर्ता, उत्कृष्ट गोलरक्षक एपिएफकै कुरियामा युया र उत्कृष्ट प्रशिक्षक कुमार थापा घोषित भए । उनीहरुले समान २५÷२५ हजार रुपैँयाको साथमा ट्रफि हात पारे ।
मनाङ मस्र्याङदीलाई टाइब्रेकरमा ५–४ ले हराउँदै पहिलो पटक उपाधी उचालेको हो । अत्यन्तै प्रतिस्पर्धात्मक फाइनल खेलको निर्धारित ९० मिनेटको खेल २–२ गोलको बराबरीमा सकिएको थियो ।
थप गरिएको अतिरिक्त ३० मिनेटमा समेत गोल हुन नसकेपछि खेल टाइब्रेकरमा धकेलिएको हो । उपाधी संगै एपिएफले नगद १० लाख रुपैँया प्राप्त गरेको छ । उपविजेता मनाङले ५ लाख रुपैँया प्राप्त गरेको छ ।
टाइब्रेकरमा एपिएफका कप्तान नविन लामा,सनिस श्रेष्ठ,रवि थिङ, मनि लामा र अर्मन्ड वेडोमले गोल गरे । मनाङका लागि फ्रेन्कलिन कुते, दयानन्द सिंह, शिव गुरुङ र रुपेश केसीले गोल गरे । ओलावालेको प्रहारलाई भने एपिएफका गोलरक्षक कुरियामा युयाले रोक्दै उपाधी दिलाए ।
पहिलो हाफमा अग्रता लिएको एपिएफले अग्रता जोगाउन नसक्दा जितका लागि टाइब्रेकरको सहारा लिन परेको हो । एपिएफले खेलको २१ औं मिनेटमा गोल गर्दै अग्रता लियो । अर्मन्ड वेडोमको पासमा युवराज खड्काले गोल गरे ।
मनाङले खेल सुरु भएको दोस्रो मिनेटमानै अग्रता गर्नबाट चुक्यो । ओलावालेको प्रहारमा गोलरक्षक कुरियामा युयाले बचाउ गरे ।
खेलको ५ औं मिनेटमा अर्मन्डको हेड प्रहार बाहिरीदाँ गोल गर्नबाट चुक्यो । १३ औं मिनेटमा मनाङका प्रवेश कुवँरको फ्रिकिक प्रहार बाहिरियो ।
२४ औं मिनेटमा अर्मन्डको हेडरमा गोलरक्षक अशोक बराल बाधक बन्दा अग्रता दोब्बर पार्नबाट चुक्यो ।३० औं मिनेटमा ओलावालेको हेडर गोलरक्षक युयाले बचाउँ गर्दा मनाङको बराबरी गर्ने अवसर गुम्यो । ३३ औं मिनेमा मनाङले बराबरी गर्ने अवसर खेर फाल्यो । राजेश परियारको फ्रिकिक प्रहार क्रसबार नजिकैबाट बाहिरीयो ।
ह्यान्डबलको अपिल गरेपनि रेफ्रिले कुनै प्रतिक्रिया दिएनन् । ४० औं मिनेटमा नविन लामाले क्रस गरेको बलमा डिफेन्डर अदित्य चौधरीको हातमा लाग्न पुगेको थियो । उनी घाइते हुन पुगे उनको हातमा चोट लागेको थियो । उनलाई गम्भिर चोट लागेपछि अस्पताल लगिएको छ ।
१ गोलले पछि परेको मनाङले दोस्रो हाफको ६७ औं मिनेटमा दयानन्द सिंहको गोल मार्फत खेलमा फर्कियो । सरोज योञ्जन र कप्तान विमल रानाको तालमेलमा विमलले कटाएको बलमा उनले उत्कृष्ट गोल गरे ।
खेलको ८४ औं मिनेटमा फ्रन्कलिन कुतेले हेडमार्फत गोल गर्दै पुनरागमन अग्रता लियो । एपिएफका डिफेन्डर राजन गुरुङले दयानन्दलाई तानेल लडाएपछि फ्रिकिकको अवसर प्राप्त गरेको थियो । विश्व अधिकारीले प्रहार गरेको फ्रिककमा कुतेले उत्कृष्ट गोल गरे ।
७ औं पटकको किर्तिमानी कायम गर्न ४ मिनेटमात्रै बाकिँ रहँदा एपिएफका रवि थिङले गोल गर्दै खेल बराबरीमा ल्याए । निर्धारित ९० मिनेटको खेलमा थप गरिएको ५ मिनेटको पहिलो मिनेटमा उनले गोल गर्दै बराबरी गरे ।
खेलमा थप गरिएको अतिरिक्त समयमा दुबै टोलीले गोल गर्न नसकेपछि खेल टाइव्रेकरमा धकेलिएको थियो । यस अघि छैटौं आहा गोल्डकप २०६४ को फाइनलमा एपिएफ नेपाल पुलिस क्लबसंग २–० गोलको हार व्यहोर्दै उपाधीबाट बञ्चित भएको थियो ।
प्रतिक्रिया लेख्नुहोस्:-