पोखरा २४ कास्कीकोटका रामजी गिरी (अर्जुन) ले विभिन्न व्यक्तिलाई ठगि गरेको आरोप लगाउँदै पिडितहरु कानूनको ढोका ढकढकाउन थालेका छन् ।
गिरीले कसैलाई पारिवारिक त कसैलाई वैदेशिक रोजगारमा लगाइदिने बाहानामा रकम लिदैँ सम्पर्कविहिन हुदैँ आएको भेटिएको छ । गिरीले सम्पर्क नम्बर समेत बारम्बार बदल्दै हिडेका छन् । गिरी विरुद्ध कास्कीमा २ पटक र रुपन्देहीमा १ पटक पिडितहरुले निवेदन दिएका छन् ।
कास्कीमा बैशाखमा र भदौमा गरि २ पटकसम्म बुटवलकी कमला शाहले निवेदन दिइन् । उनले आफू रामजीबाट ठगिएको र रकम माग्दा ज्यानमार्ने धम्कीसम्म दिएको कारण विहिबार पोखरामा पत्रकार सम्मेलन समेत गरेकी थिइन् ।
उनले रामजीले विभिन्न बाहाना बनाई आफूसंग पटक÷पटक गरी ४ लाख ७ हजार रुपैँया ठगि गरेको बताइन् । दाइको माध्यमबाट रामजीसंग ठोक्किएकी उनलाई रामजीले रकम फिर्ता दिने सर्तमा रकम मागेका थिए । २ वर्ष अघि रकम दिएकी थिइन् ।
तर, अहिले फोन गर्दा अर्कैले उठाउने र बारम्बार नम्बर परिवर्तन गर्दै आइरहेको उनले बताइन् । ‘विभिन्न बहाना बनाएर पैसा माग्दा मैले ११ पटक सम्म पैसा दिएको छु ।
हिसाव गर्दा ४ लाख ७ हजार भएको रहेछ, विदेशमा भएका दाजुसँग जानकारी लिँदा रामजी गिरी ठग हो भनेर भनेपछि बल्ल म झल्यास्स भए, त्यसपछि पैसा माग्दा उसले मारेर तिनाउ खोलामा फाल्दिन्छु भन्यो’, उनले भनिन् ‘म जस्ता कति महिला ठगिएका रहेछन् ।
मलाइ त घरायसी समस्या देखायो । म घरपनि पुगें । ज्यानमार्ने धम्कीकै कारण म यहाँ आएको हुँ ।’ प्रहरीमा २ पटक निवेदन दिएकी उनले प्रहरीबाट कुनै सुनुवाई नभएको गुनासो पोखिन् । निवेदन दिदाँसमेत प्रहरीबाट खोजी नभएको उनले सुनाइन् ।
‘पैसाको कारण भन्दापनि म ज्यानको सुरक्षाका लागि यहाँ आउन बाध्य भएकी हुँ । आफूलाई एजेन्ट बताउँदै कतिलाई ठगिसकेको रहेछ’ उनले भनिन् ।
परिवारसंग जोडिएर ठगि गर्दो रहेछ ः अनु घिमिरे
यस्तै रुपन्देही सैनामैना नगरपालिका मुर्गियाकी अनु घिमिरे र उनका भाइ नविन घिमिरे समेत ठगिएको बताइन् । रामजीले तनु घिमिरेलाई कतारमा आफ्नै क्लिनिक रहेको भन्दै ८० हजार मागेको र तनु घिमिरेकै माध्यमबाट अनुले समेत रामजीसंग चिनजान गरेको बताइन् ।
‘मैले पनि भाउजु (तनु घिमिरे) मार्फत चिनजान गरेको हुँ । भाउजुलाई कतारमा आफ्नै क्लिनिकमा जागिर दिन्छु भन्दै विश्वास दिलाएको रहेछ ।
राम्रो हुन्छ भनेपछि मैलेपनि पोर्चुगल जान लागेको मेरो भाइलाई एक पटक बुझ्न लगाए,’ उनले भनिन्–‘एक वर्षसम्म मेरो माइतमा पुग्दै घरपरिवारसंग नजिक भएछ ।
भाइलाई पनि लैजाने भन्दै २ लाख मागेछ । अरु ५ जना पनि लान सकिने भन्दै भाइलाई भनेको रहेछ, भाइका साथीहरुले पनि जाने चाहाना बनाउँदै रकम दिएका रहेछन् ।
भाइ र भाइका साथीहरुसंग गरेर ८ लाख रुपैँया लिएको थियो । अघिल्लो वर्ष मेरो आमा वित्नुभयो । म माइत गएको थिए । त्यहाँ मेरो सुनको सिक्रि लिएर गयो ।’
सिक्रि लगेपश्चात भने गिरी सम्पर्क विहिन भएको उनले बताइन् । उनले भाइ मार्फत जिल्ला प्रहरी कार्यालय रुपन्देहीमा समेत रामजी विरुद्ध निवेदन दिएकी थिइन् ।
तर, रुपन्देहीमा समेत कुनै सुनुवाई नभएको उनले गुनासो पोखिन् । गत वर्ष नै उनीहरुले जिल्ला प्रशासन कार्यालय रुपन्देहीमा समेत कारबाहीका लागि उजुरी गरेका थिए ।
प्रशासनले समेत जिल्ला प्रहरी कार्यालयलाई पत्राचार गरेको थियो । तर, प्रहरीले भने कुनै जानकारी दिएन । रामजीले आफ्नो नविल बैंकको खातामा रकम हाल्न लगाउँदै आएका थिए । उनले वैदेशिक रोजगारमा राम्रो ठाउँमा जागिर मिलाउने भन्दै रकम लिने गरेको पिडितहरुले बताए ।
कहाँ छन् रामजी ः?
कास्कीका रामजी कहाँ छन् पिडितलाई अत्तोपत्तो छैन् । कपडा झैं नम्बर समेत परिवर्तन गर्ने रामजी अहिले कहाँछन् थाहा छैन् । रामजीबाट ठगिएका भनिएका पिडितहरुले कहिले टिकटक त कहिले फेसबुकमा रामजीको फोटो राख्दै भेटेमा सम्पर्क गर्न अनुरोध गरिरहेका छन् ।
रामजी विरुद्ध एक वा दुई व्यक्तिले ठगिएको भनेका छैनन् । धेरै विदेशिएका व्यक्तिहरुले समेत आफूहरु ठगिएको बताइरहेका छन् ।
रामजी युवासंघको कार्यकता समेत रहेको पिडितहरुले बताइरहेका छन् । रामजीको बताइएको नम्बरमा सम्पर्क गर्न खोज्दा सम्पर्क हुन सक्दैन । उनको वास्तविक नम्बर समेत पिडितहरुसंग छैन् ।
जस्ले गर्दा रामजीबाट लिनुपर्ने रकम वर्षौ वितिसक्दा समेत लिन सकिरहेका छैनन् ।
हदम्याद सकियो अदालत जानुपर्छ ः प्रवक्ता हमाल
जिल्ला प्रहरी कार्यालय कास्कीका प्रवक्ता एवम् प्रहरी नायव उपरिक्षक सुवास हमालले हदम्याद सकिएको कारण आफूहरुले केहीगर्न नसक्ने प्रतिक्रिया दिए ।
प्रहरीबाट केही हुन नसक्ने बताउँदै पिडितलाई कारबाहीका लागि अदालत जान सुझाव दिएको जानकारी दिए । ‘ठगि मुद्दाका लागि हदम्याद हुन्छ । कानून भन्दा बाहिर हामी जान मिल्दैन ।
वहाँहरु अदालत जान सक्नुहुन्छ । हामीले त्यही भनेर पठाएका छौँ’ उनले भने । कुनै व्यक्तिले ठगि गरेको भन्ने शंका लागे १ वर्षभित्र उजुरी दिएमात्र प्रहरीले अनुसन्धान गर्न मिल्ने उनले बताए ।
प्रतिक्रिया लेख्नुहोस्:-