लन्डन । तमुधिं यूकेले २९ अगष्टमा नेपाली मेलाको आयोजना गर्ने भएको छ । कोरोना महामारीका कारण गत वर्ष स्थगित मेलाको १२ औं संस्करण यो वर्ष गर्न लागिएको हो ।
लन्डनस्थित नेपाली दूतावासको सहकार्यमा मेला गर्न लागिएको हो । बेलायतकै सबैभन्दा वृहत फुटबल प्रतियोगिता ‘गोर्खा कप’ सकिएको महिनादिन भित्र केम्पटन पार्क रेस कोर्समा मेला हुनेछ ।
आइतबार आयोजित पत्रकार सम्मेलनमा मेला संयोजक वरिष्ठ उपाध्यक्ष हरि गुरुङले तयारीबारे विस्तृत जानकारी दिए । करिब ३० हजार पाउण्ड खर्च लाग्ने अनुमान गरिएको मेलामा बेलायतस्थित विभिन्न १९ संघसंस्थाले भाग लिने तय भएको संयोजक गुरुङले बताए ।
संस्थाले नेपाली कला संस्कृति, परम्परा, रहनसहन, भेषभुषा झल्कने विभिन्न झांकी, नृत्य प्रस्तुत गर्नेछ । बेलायत सरकारले कोरोना सम्बन्धि नियम हटाएपनि इच्छुक आगन्तुकलाई मास्क र स्यानिटाइजर उपलब्ध गराइने संयोजकले जनाए ।
उनले कोभिड संक्रमण बढिरहेका बेला करिब तीन हजार दर्शक सहभागी हुने अनुमान गरिएको बताए । ‘विगतमा करिब १० हजारसम्म दर्शक सहभागी भएका हुन् तर यसपटक परिस्थिति फरक छ ।
तीनहजार दर्शकमात्र आएपनि हामी ब्रेकइभनमा हुनेछौं’, उनले भने । राजदूत लोकदर्शन रेग्मीले मेला उद्घाटन गर्ने तय छ । दिउसो एक बजे झांकी प्रस्तुति शुरु हुने आयोजकले जनाएका छन् ।
यसपटक विगत जस्तो अन्य देशका कूटनीतिज्ञहरु उल्लेख्य सहभागी नहुने सम्भावना छ । ‘डिप्लोम्याट्स निमन्त्रणा गर्ने जिम्मा दूतावासलाई दिइएको हो ।
समय अभाव, कोभिड र दूतावासमा सबै नयां टिम भएका कारण धेरै डिप्लोम्याट्स नहुन सक्छन्’, संयोजक गुरुङले भने, ‘तर, विदेशीहरु र स्थानीय काउन्सिल नेताहरु दर्शकका रुपमा रहने अपेक्षा छ ।
’ मेलामा खाना, च्यारिटी, हस्तकला लगायतका २७ व्यापारिक स्टल रहनेछन् । विभिन्न सांस्कृतिक प्रस्तुति र दर्शकले काटेको टिकटबाटै राफल ड्र पनि सञ्चालन गरिनेछ ।
राफल ड्र प्रथम विजेतालाई एक तोला सुन, द्धितिय विजेतालाई ट्याबलेट र तृतीयलाई एकसय पाउण्ड नगद दिइने तमुधिं यूकेले जनाएको छ ।
बिहान १० देखि सांझ ८ बजेसम्म हुने मेलामा सहभागी भएर नेपाली मौलिकपनको रसस्वादन गर्न तमुधिं यूके अध्यक्ष हित काजी गुरुङले अपिल गरेका छन् ।
‘नेपाली मेला तमुधिं यूकेको मात्र नभइ समग्र बेलायतवासी नेपालीको हो र यो मुनाफा कमाउने उद्देश्यले गर्न लागिएको होइन’, अध्यक्ष गुरुङले भने, ‘विदेशमा पनि नेपाली कला संस्कृति, रितिरिवाज, भेषभूषा, धर्म संरक्षण र प्रवर्धन हाम्रो मुख्य उद्देश्य हो ।
हामीलाई मेला सफल पार्न सबैको सहयोग खांचो छ ।’ उक्त मेलामा झांकी र नृत्य दुवैमा प्रथम हुने समूहलाई एकहजार एकसय पाउण्डसहित ‘एम्बासडर कप’ प्रदान गरिनेछ ।
प्रथम हुनेलाई अतिरिक्त ३ सय पाउण्डको ‘एनआरएनए यूके कप’ समेत दिइनेछ । दोश्रो हुनेले ७ सय पाउण्ड एवं तेश्रो हुनेलाई ५ सय पाउण्ड नगद प्रदान गरिनेछ ।
त्यसैगरि झांकीमा मात्र प्रथम हुनेलाई ५ सय पाउण्ड र दोश्रो हुनेलाई ३०० पाउण्ड तथा नृत्यमा प्रथम हुनेलाई ५०० पाउण्ड र दोश्रो विजेतालाई ३०० पाउण्ड प्रदान गरिनेछ ।
मेलाका लागि दूतावासबाट २५ सय पाउण्ड सहयोग प्राप्त भएको तमुधिं यूकेले जनाएको छ । झांकी निर्णायकमा नेपाली कला, संस्कृतिविद ४ जना र नृत्यको निर्णायकमा ३ जना बेग्लै व्यक्ति रहने आयोजकले जनाएका छन् ।
महासचिव परशु गुरुङले सञ्चालन गरेको उक्त कार्यक्रममा आमा समूहकी महासचिव यशोदा गुरुङले आफ्नो तयारीबारे जानकारी दिइन् ।
प्रतिक्रिया लेख्नुहोस्:-