पहिरो, बाढी तथा अविरल वर्षाको कारण १६ जनाको मृत्यु

काठमाडौं । मुगु, छाँयानाथ रारा नगरपालिका ११ सालिम बस्तीमा सोमबार बिहान पहिरो जाँदा पहिरोमा पुरिएर ८ जनाको मृत्यु भएको छ । पहिरो जाँदा घरहरू पुरिएको भन्ने खबर प्राप्त हुनासाथ नेपाली सेना, नेपाल प्रहरी र सशस्त्र प्रहरी बल नेपालबाट संयुक्त रुपमा खटिएको टोलीले ८ जनाको शव तथा अन्य ५ जनालाई घाइते अवस्थामा फेला पारेको हो ।

हुम्ला, चंखेली गाउँपालिका ६ मेल्छाम डुमबाडा बस्ने मनबिर बिकको घरमा आइतबार साँझ पहिरो जाँदा घर भत्किएर ६० वर्षीया तुलसा कामी समेत ४ जनाको मृत्यु भएको छ । उनको घर पहिरोले पुरिएको भन्ने खबर प्राप्त हुनासाथ प्रहरी चौकी मेल्छामबाट खटिएको प्रहरीले तुलसा समेत ४ जनाको शव फेला पारेको हो । साथै पहिरोमा पुररिएर १ जना गम्भीर घाइते भएका छन् ।

कालिकोट, सान्नीत्रिवेणी गाउँपालिका ८ मुम्रा डालुके बस्ने जस बहादुर खत्रीको छोरा १४ वर्षीय कबुल केसीको पहिरोमा परेर आइतबार दिउँसो मृत्यु भएको छ । बाटोमा हिँडिरहेको अवस्थामा एक्कासि माथिबाट पहिरो आई च्यापिएर गम्भीर घाइते भएका उनको स्थानीय मेडिकलमा उपचारको क्रममा मृत्यु भएको हो । साथै पहिरोमा परेर सोही ठाउँ बस्ने २४ वर्षीया सोबिता सहकारी र २४ वर्षीया कल्पना बुढा घाइते भएका छन् ।

यसैगरी कालिकोट, तिलागुफा नगरपालिका ७ बालीगाउँ बस्ने धुर्वराज बिष्टको २ वटा घर र सोही ठाउँ बस्ने उपेन्द्र बिष्टको १ वटा घरमा आइतबार बिहान पहिरो गई भत्किदा २ जनाको शव फेला परेको छ भने अन्य ४ जना बेपत्ता भएका छन् । प्रहरी चौकी छाप्रेबाट खटिएको प्रहरीले बेपत्ता भएकाहरुको खोजी गरिरहेको छ ।

यसैगरी कालिकोट, तिलागुफा नगरपालिका १ पुलचोक भन्ने स्थानमा हिमा नदीमा आएको बाढीले शुभकालिका गाउँपालिका ८ घर भई नाग्म बजारमा होटल पसल गरी बस्ने ४६ वर्षीय उदय बहादुर शाहीको ४ तले घर बाढीले बगाएर पूर्णरूपमा क्षति भएक छ । साथै सोही ठाउँस्थित जुम्ला र मुगु जाने सडक समेत पूर्णरूपमा अवरोध भएको छ ।

बाजुरा, जगन्नाथ गाउँपालिका १ ढाडाकोट डिमुरगाउँ बस्ने ४५ वर्षीय प्रभुलाल गिरीको अबिरल बर्षातको कारण घर भत्किँदा गिरीको घटनास्थलमै मृत्यु भएको छ । साथै पहिरोको कारण सोही ठाउँ बस्ने रघु गिरि, कपुर गिरि, जय गिरी र परी गिरीको घर पूर्णरूपमा क्षति भएको छ ।

अर्घाखाँची, सन्धिखर्क नगरपालिका ११ जोगिमारे गाँउमा आइतबार बिहान पहिरो जाँदा ६ वटा घर पूर्ण रुपमा क्षति भएको छ भने १८ घर जोखिममा रहेका छन् ।

दाङ, घोराही उपमहानगरपालिका १६ शिब शक्ति टोल बस्ने ४९ वर्षीय छोटीलाल चौधरीको घर अविरल वर्षाका कारण आइतबार साँझ भत्किँदा करिब ३ लाख रूपैयाँ बराबरको धनमाल नष्ट भएको छ ।

नजिकैको प्रहरी कार्यालयबाट तत्काल घटनास्थलमा खटिएको प्रहरीले आवश्यक उद्दार कार्य गरिरहेको छ ।