पोखरा–नेपाल दलित महिला संघ (फेडो) ले मंगलबार दलित महिलाको सामाजिक न्यायका लागि सुशासन र विकासको सुदृढीकरण सम्बन्धि अन्तरक्रिया कार्यक्रम सम्पन्न गरेको छ ।
कार्यक्रममा जातीय विभेदको अन्त्य गर्ने कुरामा स्थानीय सरकारको प्रमुख दायित्व रहेको वक्ताहरुले बताएका छन् । जनताका पहिलो सरकार नै स्थानीय तह रहेकाले जातीय विभेदका लागि स्थानीय तहमै पहल हुन आवश्यक रहेको उनीहरुको भनाई थियो ।
माछापुच्छे्र गाउँपालिका ६ का वडा अध्यक्ष हरिश्चन्द्र ढुङ्गानाले पुर्वाधारको विकास मात्र विकास नभई मानसिक विकास समेत विकास रहेको बताए ।
उनले संघदेखी स्थानीय तहसम्म पुर्वाधार विकास मात्रै गरेर विकास गरेको गर्व गरेपनि वास्तविक विकासका लागि मानसिक विकास पनि आवस्यक रहेको सुनाए ।
जातीय विभेदको मुद्धामा बोल्दै उनले पुर्वाधार र मानसिक विकासलाई संगसंगै लिएर हिड्नुपर्नेमा जोड दिए । उनले दलित पछि पर्नुका कारण सिर्जनशिल नहुनु रहेको बताए ।
‘जातीय विभेद आजको मुख्य समस्या हो । अर्को तर्फ दलितहरु गरिब हुनुको कारण सिर्जनशिल नहुनालेपनि हो । अब सचेतना भन्दापनि सिर्जनशिल काम गरेर अघि बढ्न आवश्यक छ’ उनले भने ।
ढुङ्गानाले अहिलेको पुस्तालाई सम्झाउनै नसक्ने गरी विभेद मस्तिस्कमा पसेका कारण अबका पुस्तालाई विभेदको अन्त्य हुनेगरी शिक्षा दिनुपर्ने बताए ।
यस्तै इन्सेक गण्डकी प्रदेश संयोजक शिव खकुरेलले अब दलित भनेर कोटामा मात्रै सिमित नभई खुल्ला रुपमा प्रतिस्पर्धा गरेरै अघिबढ्नुपर्ने बताए ।
उनले संविधानले जातीय विभेदलाई व्याख्या गरेपनि व्यवहारमा कार्यान्वयन नहुँदा समस्या भएको सुनाए । उनले जनप्रतिनीधिको दिमागमा पुर्वाधारको विकास मात्रै विकास रहेको र मासिक विकास सोँचमा नै नभएको उनले सुनाए ।
‘अहिलेका जनप्रतिनीधिदेखि केन्द्रिय नेताहरु यहाँ बजेट पारे त्यहाँ बजेट पारे र पुल सम्पन्न भयो भवन सम्पन्न भयो भन्दै सेल्फि हाल्छन् तर कसैले पनि दलितको समस्या के हो ।
महिलाको समस्या के हो ? समाधान गरे भनेर भन्दैन् त्यो ठाउँसम्म पुग्दैनन्’ उनले भने । अन्तरक्रिया कार्यक्रममा दलित महिलालाई निर्वाचनका बेला मात्रै घरबाट उठाउने गरेको र अघिपछि दलित मुद्धा ओझेमा परेको वक्ताहरुले बताएका थिए ।
प्रतिक्रिया लेख्नुहोस्:-