पोखरा । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत गण्डकी प्रदेश भूगोलतर्फको निर्वाचन परिणामलाई लिएर उम्मेदवार पूजा वास्तोलाले गम्भीर असन्तुष्टि व्यक्त गरेकी छन्।
वास्तोलाले शुक्रबार जारी गरेको प्रेस विज्ञप्तिमा आफूले प्रतिनिधिहरूबाट ९१३ मत प्राप्त गरेको र महिलातर्फ शीर्ष दुई तथा खुलातर्फ शीर्ष पाँचभित्र पर्ने मत परिणाम प्राप्त गरे पनि अन्तिम नतिजामा आफूलाई निर्वाचित सूचीबाट बाहिर राखिएको दाबी गरेकी छन्।
उनले निर्वाचन आयोगले सार्वजनिक गरेको अन्तिम परिणाममा आफूभन्दा कम मत प्राप्त गर्ने उम्मेदवार निर्वाचित भएको उल्लेख गर्दै उक्त निर्णय विधि, प्रक्रिया र स्थापित मापदण्डविपरीत रहेको आरोप लगाएकी छन्।
विज्ञप्तिमा उनले यो विषय पद, विजय वा पराजयको नभई पद्धति, सुशासन र लोकतान्त्रिक प्रक्रियाको विश्वसनीयतासँग जोडिएको बताएकी छन्। “यदि लोकतान्त्रिक प्रक्रियाभित्र नै विधि मिचिन्छ, मत परिणामभन्दा फरक नतिजा घोषणा गरिन्छ भने त्यसले हामीले निर्माण गर्न खोजेको राजनीतिक संस्कारमाथि प्रश्न उठाउँछ,” उनले उल्लेख गरेकी छन्।
वास्तोलाले लोकतन्त्रको शक्ति परिणाममा मात्र नभई परिणामसम्म पुग्ने प्रक्रियाको निष्पक्षता र विश्वसनीयतामा निर्भर रहने बताउँदै प्रक्रिया अन्यायपूर्ण भए त्यसविरुद्ध आवाज उठाउनु आफ्नो जिम्मेवारी भएको जनाएकी छन्।
यस विषयमा आफूले पार्टीको केन्द्रीय निर्वाचन आयोगमा आधिकारिक उजुरी दर्ता गराइसकेको तर चित्तबुझ्दो जवाफ नपाएको र उल्टै विषयलाई दबाउन खोजिएको अनुभव गरेको उनले बताएकी छन्।
त्यसैकारण अब सर्वोच्च अदालतमा रिट दायर गरी कानुनी उपचार खोज्ने निर्णयमा पुगेको जानकारी दिँदै उनले यो संघर्ष व्यक्तिगत स्वार्थका लागि नभई आफूलाई विश्वास गरेर मत दिने ९१३ प्रतिनिधिको मतको सम्मान, सही प्रक्रिया, पारदर्शिता र संस्थागत न्यायका लागि भएको स्पष्ट पारेकी छन्।
“पदभन्दा ठूलो पद्धति हुन्छ र म पद्धतिको पक्षमा अन्तिमसम्म उभिनेछु,” विज्ञप्तिमा वास्तोलाले उल्लेख गरेकी छन्।
प्रतिक्रिया लेख्नुहोस्:-