चाङ्गानको नयाँ विद्युतीय खेलकुद उपयोगी सवारी साधन ‘नेभो क्यू०५’ पोखरामा सार्वजनिक गरिएको छ। पोखरामा शुक्रबार साँझ आयोजित एक समारोहका बीच पोखरा उद्योग वाणिज्य संघका अध्यक्ष शोभा गौतमले नेभो क्यू०५ सार्वजनिक गरेकी हुन् ।
कार्यक्रममा बोल्दै अध्यक्ष गौतमले पछिल्लो समय पोखरामा नयाँ–नयाँ विद्युतीय सवारी साधन सार्वजनिक हुनुका साथै बिक्री–वितरणसमेत विस्तार हुँदै जानुले पोखरा क्षेत्रको आर्थिक गतिविधिलाई थप चलायमान बनाउन सहयोग पुग्ने बताइन । वातावरणमैत्री विद्युतीय सवारी साधनप्रति पोखरेलीको आकर्षण बढिरहेको उल्लेख गर्दै उनले नेभो क्यू०५ लाई पनि पोखरेली उपभोक्ताले रुचाउने विश्वास व्यक्त गरिन् ।
पोखरामा विद्युतीय सवारी साधनको प्रयोग बढ्दै जानुले वातावरण संरक्षणसँगै यातायात क्षेत्रलाई आधुनिक र दिगो बनाउने दिशामा समेत योगदान पुग्ने उनको भनाइ थियो । समारोहमा नेपाल अटोमोबाइल डिलर्स संघका पूर्वअध्यक्ष ध्रुव थापा, पश्चिमाञ्चल अटोमोबाइल डिलर्स संघका उपाध्यक्ष निरन केसी, दिपलका सद्भावना दूत प्रदीप खड्का, होटल संघ पोखरा नेपालका अध्यक्ष लक्ष्मण सुवेदी, एमएडब्ल्यू वृद्धी अटोकर्प प्रालिका निर्देशक पार्थ सिकरिया तथा प्रमुख कार्यकारी अधिकृत ज्ञानेन्द्रबहादुर चन्दलगायतको उपस्थिति थियो ।
एमएडब्ल्यू वृद्धी अटोकर्प प्रालिले नेपालमा भित्र्याएको नेभो क्यू०५ को अल्ट्रा संस्करणको मूल्य ५१ लाख ९९ हजार रुपैयाँ तोकिएको छ। कम्पनीले नेभो क्यू०५ लाई आराम, आकर्षक बनावट र अत्याधुनिक प्रविधिको संयोजन भएको सानो आकारको विद्युतीय खेलकुद उपयोगी सवारीका रूपमा बजारमा प्रस्तुत गरेको हो ।
१२० किलोवाट क्षमताको विद्युतीय मोटरबाट सञ्चालित नेभो क्यू०५ ले शून्यदेखि १०० किलोमिटर प्रतिघण्टाको गति ८ दशमलव १ सेकेन्डमा हासिल गर्न सक्ने कम्पनीले जनाएको छ । कम्पनीका अनुसार एकपटक पूर्ण रूपमा चार्ज गरेपछि परीक्षण विधिअनुसार यसले अधिकतम ४६२ किलोमिटरसम्मको यात्रा गर्न सक्छ । अर्को परीक्षण विधिअनुसार भने यसको यात्रा क्षमता ४०५ किलोमिटर रहेको जनाइएको छ । यसको ऊर्जा खपत प्रतिएक सय किलोमिटर १२ दशमलव ९ किलोवाट घण्टा रहेको कम्पनीको दाबी छ ।
यस्तै नेभो क्यू०५ मा ‘गोल्डेन सिल्ड ब्याट्री २.०’ प्रविधिसहितको ब्याट्री प्रयोग गरिएको छ । कम्पनीका अनुसार उपयुक्त अवस्थामा यसको ब्याट्री ३० प्रतिशतबाट ८० प्रतिशतसम्म करिब १५ मिनेटमै चार्ज गर्न सकिन्छ । गाडीमा १४ दशमलव ६ इन्चको उच्च गुणस्तरको सूचना तथा मनोरञ्जन पर्दा, ताररहित मोबाइल जडान सुविधा, चालक सहायता प्रणाली तथा चारैतर्फको दृश्य देखाउने क्यामेरा प्रणालीलगायतका सुविधा उपलब्ध छन् । भेरियन्टअनुसार १८ वटासम्म चालक सहायता सुविधा र ५४० डिग्रीसम्मको दृश्य देखाउने प्रणालीसमेत उपलब्ध हुने कम्पनीले जनाएको छ ।
कम्प्याक्ट आकारमा निर्माण गरिए पनि नेभो क्यू०५ को भित्री भागलाई फराकिलो तथा व्यवहारिक बनाइएको छ। यसको २ हजार ७३५ मिलिमिटरको पाङ्ग्रा दूरी र ८६ दशमलव ६ प्रतिशतसम्मको भित्री स्थान उपयोगले यात्रुका लागि पर्याप्त ठाउँ उपलब्ध गराउने कम्पनीको भनाइ छ । पछाडिको सिटमा तीन जना वयस्क सहज रूपमा बस्न सक्ने तथा सिटलाई २८ र ३३ डिग्रीका दुई फरक कोणमा ढल्काउन सकिने व्यवस्था गरिएको छ । सिटहरू नौ तहको शरीरअनुकूल संरचनामा निर्माण गरिएको जनाइएको छ। गाडीमा ५४० लिटर क्षमताको दुई तहको सामान राख्ने स्थान, ९० लिटरको लुकाइएको भण्डारण कक्ष तथा विभिन्न प्रयोजनका लागि २९ वटासम्म भण्डारण स्थान रहेको कम्पनीले जनाएको छ । साथै, आवाज तथा बाहिरी कोलाहल कम गर्न ६७ भन्दा बढी स्थानमा ध्वनि नियन्त्रणको व्यवस्था गरिएको छ । छानिएका संस्करणमा १ दशमलव ८ वर्गमिटरको ठूलो पारदर्शी छाना र विद्युतीय सूर्यछेक पर्दासमेत उपलब्ध हुने जनाइएको छ। नेभो क्यू०५ को बाहिरी बनावट चाङ्गानका विश्वव्यापी बनावटसम्बन्धी उपाध्यक्ष तथा फोक्सवागन समूहका पूर्व डिजाइन प्रमुख क्लाउस जिक्योरा नेतृत्वको टोलीले विकास गरेको कम्पनीले जनाएको छ । कम्पनीका अनुसार यसको विकासमा ३१ देशका ९१५ भन्दा बढी बनावट विशेषज्ञले योगदान गरेका छन् । ‘फुगुआङ’ बनावट अवधारणाबाट प्रेरित क्यू०५ मा सन्तुलित अनुपात, आकर्षक बाहिरी स्वरूप र वायुगतिकीय संरचनालाई प्राथमिकता दिइएको छ ।
यसको वायुगतिकीय प्रतिरोधाङ्क ० दशमलव २६५ रहेको कम्पनीले जनाएको छ । गाडीमा पूर्ण चौडाइमा फैलिएको अगाडिको प्रकाश संरचना, आकर्षक पछाडिको प्रकाश, अर्धलुकेका ढोकाका ह्यान्डल तथा आधुनिक बाहिरी बनावट दिइएको छ। कम्पनीका अनुसार नेभो क्यू०५ ले सन् २०२६ को गोल्डेन ए डिजाइन पुरस्कारसमेत प्राप्त गरेको छ । नेभो क्यू०५ सार्वजनिक गरेसँगै पोखरामा चारदिने विशेष परीक्षण कार्यक्रमसमेत आयोजना गरिएको छ । ग्राहकहरूले असोज ३ गतेदेखि ६ गतेसम्म चाउथेमा रहेको दिपल पोखरा प्रदर्शनी कक्षमा पुगेर नेभो क्यू०५ चलाएर प्रत्यक्ष अनुभव लिन सक्नेछन् । कम्पनीले पोखरामा सार्वजनिक गरिएको यस नयाँ विद्युतीय सवारी साधनमार्फत नेपाली बजारमा आराम, उपयोगिता, आकर्षक बनावट र आधुनिक प्रविधिको संयोजन प्रस्तुत गर्न खोजिएको चाङ्गान अटोमोबाइल चीनको लामो औद्योगिक इतिहास भएको प्रमुख सवारी साधन निर्माता कम्पनीमध्ये एक हो। कम्पनीले विश्वका एक सयभन्दा बढी देशमा आफ्नो उपस्थिति रहेको तथा नयाँ ऊर्जा, विद्युतीय सवारी र नयाँ पुस्ताको यातायात प्रविधिमा लगानी गर्दै आएको जनाएको छ । नेपालमा चाङ्गान तथा यसका दिपल, नेभो र अवात्र ब्रान्डका सवारी साधनको आधिकारिक बिक्री–वितरण एमएडब्ल्यू वृद्धी अटोकर्प प्रालिले गर्दै आएको छ । कम्पनीले नेपाली बजारमा आधुनिक प्रविधि, नयाँ बनावट र विद्युतीय सवारी साधन विस्तार गर्ने लक्ष्यसहित विभिन्न मोडल सार्वजनिक गर्दै आएको कम्पनीका रुपेश श्रष्ठले बताए ।
प्रतिक्रिया लेख्नुहोस्:-