सिर्जना हत्या प्रकरण : ज्वाइँ र अर्का भान्जा पक्राउ

पोखरा ÷ पोखरामा सम्पत्तिका लागि भएको सिर्जना केसी हत्या प्रकरणमा थप दुई जना आफन्त पक्राउ परेका छन् । पक्राउ पर्नेमा उनका आफन्त वसन्त केसी र नवराज पौडेल रहेका छन् । प्रहरीले यस अघि २ जनालाई पक्राउ गरेको थियो ।
सिर्जना केसीमाथि खुडा प्रहार गर्ने उनका भान्जा शिसिर केसी र कुशल परियारलाई पक्राउ गरेको थियो ।
पोखरा ५ मालेपाटन घर भइ पोखरा १८ सेदी बस्दै आएकी ४२ वर्षिय सिर्जना केसीमाथि चैत २५ गते राती सवा सात बजे व्यस्त बजार सभागृहचोक नजिक खुडा प्रहार भएको थियो ।
अचेत भइ लडेकी उनलाई नजिकैको गण्डकी मेडिकल कलेजमा उपचारका लागि लगिएपनि चिकित्सकले मृत घोषणा गरेको थियो ।
घटनाको २४ घण्टापश्चात प्रहरीले २ जनालाई पक्राउ गरेको थियो । सम्पत्तिको विषयलाई लिएर पारिवारिक द्धन्द्धको कारण उनीमाथि प्रहार भएको थियो ।
जिल्ला प्रहरी कार्यालय कास्कीका सुचना अधिकारी हरिबहादुर बस्नेतले प्रहरीले सुस्म अनुसन्धान गर्दै जाँदा थप २ जना पक्राउ गरेको जानकारी दिनुभयो । उहाँका अनुसार बसन्त सिर्जनाकै भान्जा हुन् भने नवराज ज्वाइ ।
दुवै आफन्त सिर्जनाको सौतेनी तर्फका हुन् । सिर्जना कृष्ण क्षेत्रीको दोस्रो श्रीमति हुन् । पहिलो श्रीमतिको मृत्युपछि कृष्णले दोस्रो विवाह गरेका थिए । कृष्णको परिवार दोस्रो विवाहबाट वेखुसी थिए । त्यहि कारण कृष्णले सिर्जनालाई सेदीमा घर बनाइदिएका थिए ।
तर, कृष्णको समेत मृत्यु पश्चात परिवारले पहिलो श्रीमतिको छोराको नाममा सम्पत्ति दिनुपर्ने भन्दै सिर्जनालाई दबाब दिदैँ आइरहेका थिए । त्यहि कारण उनीहरुमा विवाद चलेको थियो ।