पोखरा । चुनावीमा माहोलले अहिले बजार तातेको छ । निर्वाचन नजिकिदै गर्दा विभिन्न राजनैतिक पार्टीका उम्मेदवारहरु प्रचारप्रसारमा जुटिरहेका छन् । । यस्तै कास्की क्षेत्र नं १ (ख) बाट नेकपा एमालेबाट प्रदेशसभा सदस्यका उम्मेद्वार वेद वहादुर गुरुङ श्यामु पनि यतिबेला मतदातासँगको भेटघाटमा व्यस्त छन् । उनी कास्की क्षेत्र नं १ (ख) अन्तर्गतका विभिन्न वडाहरुमा एमालेका पक्षमा मत मागिरहेका छन् । उनले बिहिबार पोखरा १२ र १३ का विभिन्न टोलहरुमा पुगेर मतदाता भेटेका छन् ।
घरदैलो कार्यक्रममा गुरुङले नीति निर्माणसँगै समृद्धिको अभियानमा जुट्ने वाचा गरे। देशलाई समृद्ध बनाउने र उक्त समृद्धिका आधारमा जनतालाई सुखी बनाउने अभिप्राय रहेको बताए । मतदातासंग भेटघाटको क्रममा बोल्दै उनले कृषिको व्यावसायीकरण र आधुनिकरण गरि उत्पादन वृद्धि र त्यसको सहि बजारीकरण गर्ने, स्थानिय बजारको व्यवस्थापन गरि स्थानिय पुंजीको विकास गर्दै उच्च गतिमा आर्थिक विकास मार्फत समृद्द नेपाल र सुखी नेपाली बनाउने प्रतिवद्धता जनाए । त्यस्तै स्वदेशमै रोजगारी सृजना गर्ने वातावरण निर्माण गर्न आफ्नो उम्मेद्वारी रहेको गुरुङको भनाई छ ।
ुव्यवस्था बदल्यौं अब देशको अवस्था फेर्न सुर्य चिन्हमा मतदान गर्नु होला। तपाईको भोट खेर जाने छैन । गुरुङले भने, अबको हाम्रो संघर्ष अनि लक्ष्य भनेको सुशासन, समृद्धि र विकास हो । यसमा तपाईहरुको साथ खाँचो छ । मलाई एकपटक चुनेर पठाउनु होला। उनले निर्वाचन क्षेत्रका हरेक समस्या अवगत रहेको बताउँदै निर्वाचित भएपछि कुनै पनि विकास निर्माणका काममा ढिलाइ नगर्ने कुरा बताए। उनले आफु मालिक नभई जनताको सेवक भएर काम गर्ने बताए ।
त्यस्तै सडक संजाल विकासको पूर्वाधार रहेकोले सडकहरुको स्तरोन्नती जोड दिने कुरा बताए । मादी गाउँपालिकाको केन्द्र याङजाकोट जोड्नेबाटो, पोखरा देखि सिक्लेस, मिजुरे, ताङतिङ, लिप्यानी, भाचोक, वार्चोक, माझठाना, अर्बा र विजयपुर जोड्ने सडकलाई पिच बनाउने छु। गुरुङले भने, पोखराका केहि वडाहरुको खाल्डा खुल्डी परेका र धुलाम्मे सडकहरुको स्तरोन्नती गर्नेछु। गुरुङले आफू मादी गाउँपालिकाको अध्यक्ष हुँदा सडक संजाल विस्तार गरेको दाबी गरे । जनताको दैलोमा पुग्दा पाएको समर्थनले पनि आफुले निर्वाचन जितिसकेको दाबी समेत गरेका छन्।
नेकपा एमालेले कास्की क्षेत्र नम्बर १ बाट प्रतिनिधि सभा तर्फ जिल्ला अध्यक्ष मन बहादुर गुरुङ, प्रदेश क तर्फ खगराज अधिकारी र ख तर्फ वेद बहादुर गुरुङ श्यामलाई उठाएका छन्। नेकपा एमाले कास्की १ ले निर्वाचन केन्द्रित रहेर उम्मेदवार भेटघाट कार्यक्रमलाई तीव्रता दिइरहेको छ ।
प्रतिक्रिया लेख्नुहोस्:-