रामजी नै कांग्रेसका उम्मेदवार ः कांग्रेस नेता गुरुङ, कृषि र पर्यटन नै यस क्षेत्रको सम्बृद्धिको आधार रहेको उम्मेदवार बरालको भनाई

पोखरा । आगामी प्रतिनिधि सभा र प्रदेश सभा निर्वाचन अन्तरगत कास्की क्षेत्र नम्बर ३ का उम्मेदवार रामजी प्रसाद बराल जीवनले यस क्षेत्रको सम्बृद्धिका लागि कृषि र पर्यटनको सँगसँथै विकास हुनुपर्ने बताउनुभएको छ ।

कास्कीको अन्नपुर्ण गाउँपालिकाको पाँच दलीय गठबन्धनको संयुक्त बैठकलाई संबोधन गर्दै उम्मेदवार बरालले कृषि र पर्यटनको समानान्तर विकासले मात्रै यो क्षेत्रको मुहार फेरिने दावी गर्नुभयो । उहाँले यस क्षेत्रका पर्यटकीय सम्भावना बोकेका क्षेत्रहरुलाइ जोगाउँदै वातावरणीय संरक्षण सहितको विकास गर्ने आफ्नो सपना रहेको बताउनुभयो । बरालले कास्की क्षेत्र ३ लाई विकास र समृद्धिका दृष्टिले एकपटक जुरुक्कै उचाल्ने आफ्नो योजना रहेको सुनाउनुभयो ।

कार्यक्रममा नेपाली कांग्रेस क्षेत्र नम्बर ३ का सभापति मनोज गुरुङले सो क्षेत्रबाट गठबन्धनको तर्फबाट प्रतिनिधिसभाका उम्मेदवार रामजीप्रसाद बराललाई नेपाली कांग्रेसको उम्मेदवार मानेर मतदान गर्न कांग्रेस कार्यकर्तालाई आह्वान गर्नुभयो । सभापति गुरुङले टिकटको र विगतको तिक्तता बिर्सेर चुनाबमा होमिन आग्रह गर्नुभयो ।

‘म पनि टिकटको आकांक्षी थिएँ । टिकट रामजीजीले पाएपछि एक÷दुई दिन त मलाई पनि गाह्रो भयो’, गुरुङले भन्नुभयो, ‘पछि उहाँ र म भेट्दै गयाँै । बुझ्दै गयौं । अब त उहाँ अब गठबन्धनको हैन, कांग्रेसको उम्मेदवार जस्तो लागेको छ ।’ द्वन्द्वकालीन तिक्तता र घाउहरु बिसर्नुपर्ने पनि उहाँको धारणा थियो । उहाँले संघमा र प्रदेश सभामा कांग्रेसको नेतृत्वमा फेरि सरकार बनाउन पनि गठबन्धनको जित आवश्यक भएको बताउनुभयो ।

प्रदेश ख का उम्मेदवार प्रकाश बरालले फेवाताल र अन्नपुर्ण बेस क्याम्पलाई जोडेर यो क्षेत्रको विकास गर्ने बताउनुभयो । नेता बरालले उडन्ते र प्रचारका कुरा गर्ने तर कामको सिन्को नभाँच्ने आफ्नो बानी नरहेको भन्दै जनता सामु गरेका प्रतिबद्दता पूरा गर्ने बताउनुभयो ।

नेपाली कांग्रेस अन्नपुर्ण गाउँपालिकाका कार्यबाहक अध्यक्ष शुशिल भट्टचनले गठबन्धनको बैठकपछि अब खुलेर चुनाबमा जाने वातावरण बनेको बताउनुभयो । ‘अब अन्नपुर्ण गाउँपालिकामा जय नेपाल र लाल सलामको नारासँगै घन्काएर जयलाल भन्दै चुनाबी अभियान गरिनेछ’, उहाँले भन्नुभयो ।

यससँगै अन्नपुर्णको चुनाबी कार्यालयको कार्यालय पनि सुरु भएको छ । नौडाँडामा स्थापित कार्यालयको उम्मेदवार र नेताहरुले उद्घाटन गरे । कार्यक्रममा निर्वाचन परिचालन समितिका संयोजक राजबहादुर गुरुङले गाउँपालिकाको घरदैलोको कार्यक्रमका बारेमा जानकारी गराएका थिए । कार्यक्रममा निर्वाचन प्रचार प्रसार समितिका सह संयोजक त्रिभुवन पौडेलले बाम लोकतान्त्रिक गठबन्धनका कारण संविधान र गणतन्त्र जोगिएको स्मरण गर्दै व्यवस्था जोगाउने पार्टीका नेताहरु मिल्नुले व्यवस्था बलियो भएको सन्देश भएको बताउनुभयो ।

नेपाली कांग्रेस कास्कीका उपसभापति युवराज कुँबर, माओवादी केन्द्रका नेताहरु चुडामणी अधिकारी, भेषराज पौडेल, नेसपाका युवा नेता नेत्र चापागाई, नेकपा एसका पालिका अध्यक्ष भरत देवकोटालगायतले मन्तव्य राखेका थिए ।