काठमाडौं । रौतहट, चन्द्रपुर नगरपालिका २ स्थित सडकमा बाग्मती प्रदेश ०३-००१ ख २०१ नम्बरको बस र प्रदेश २-०२-००१ ह २१०९ नम्बरको अटो एक-आपसमा ठोक्किएर बिहीबार बिहान दुर्घटना हुँदा अटो चालक समेत अटोमा सवार ३ जनाको मृत्यु भएको छ ।
मृत्यु हुनेहरुमा अटो चालक सर्लाही बाग्मती नगरपालिका २ सोल्टी बस्ने ३९ वर्षीय रबि मंगर, अटोमा सवार सोही ठाउँ बस्ने ५० वर्षीय ढक बहादुर लुंगेली मंगर र ३९ वर्षीय प्रेम ठाडा मंगर रहेका छन् ।
दुर्घटनामा गम्भीर घाइते भएका उनीहरुको चन्द्रपुर प्रालि अस्पताल चपुरमा उपचारको क्रममा मृत्यु भएको हो । साथै दुर्घटनामा घाइते भएकी अटोमा सवार सोही ठाउँ बस्ने ३६ वर्षीया सबिना लुंगेली मंगरलाई चन्द्रपुर प्रालि अस्पताल हुँदै थप उपचारको लागि बी एण्ड बी अस्पताल काठमाडौंमा पठाइएको छ । बस चालकलाई प्रहरीले नियन्त्रणमा लिएको छ ।
मकवानपुर, मनहरी गाउँपालिका ९ खरंगामा बा ३-००१ ख २४८१ नम्बरको बस र बा.प्र.०३-००५ प २६६३ नम्बरको मोटरसाइकल एक-आपसमा ठोक्किएर बिहीबार दिउँसो दुर्घटना हुँदा मोटरसाइकल चालक पूर्व नवलपरासी बुलिङटार गाउँपालिका १ बस्ने ३३ वर्षीय गोपाल सारुको मृत्यु भएको छ । दुर्घटनामा गम्भीर घाइते भएका उनको चुरे हिल अस्पतालमा उपचारको क्रममा मृत्यु भएको हो । बसलाई नियन्त्रणमा लिएर हाल फरार रहेका बस चालकको प्रहरीले खोजी गरिरहेको छ ।
प्रतिक्रिया लेख्नुहोस्:-