मोरङ– मोरङको रंगेली नगरपालिकामा शनिबार रातिबाट अवरुद्ध मतगणना पुनः सुरु भएको छ। निर्वाचन आयोगका प्रमुख आयुक्त दिनेश थपलियाले सोमबार स्थलगत रुपमा घटनाबारे जाँचबुझ गरेपछि बेलुका साढे ६ बजेबाट पुनः मतगणना सुरु भएको हो।
रंगेलीस्थित निर्वाचन अधिकृत रामहरि शर्माले सबै वडामा सुरुआतबाट गणना सुरु गरिएको जानकारी दिए।
यसअघि, वडा नम्बर १, २ र ३ को मतगणना भइरहेको थियो। शनिबार राति वडा नम्बर ८ को एउटा मतपेटिकाको सिल टुटेको भेटिएपछि नेपाली कांग्रेसले गणना कार्य रोकेको थियो। ९ वटा वडा कार्यालय रहेको रंगेलीमा २७ हजार २ सय ७ मत खसेको छ। रंगेलीमा कांग्रेसका मेयरका उम्मेदवार मोदराज घिमिरेले सबै वडाको गणना पुनः सुरुबाट गरिनुपर्ने मागसहित अघि बढेको बताए।
उनले भने, ‘यसअघि गणना गरिएको वडाको गणना पुनः हुनेछ। निर्वाचन आयुक्तसहित दलका नेता, मोरङका प्रमुख जिल्ला अधिकारी लगायतको छलफलपछि सहमति बनाएर गणना अघि बढेको हो।’ शुक्रबार रातिबाट गरिएको गणनामा एमालेका मेयर दिलीप बगडियाले १ हजार ६ सय ३१ मत पाएका थिए भने घिमिरे १ हजार ६७ मतमा रहेका थिए।
निवर्तमान मेयर बगडियाले २०७४ सालको निर्वाचनमा तत्कालिन नेकपा माओवादीबाट प्रतिस्पर्धा गरेका थिए। माओवादीबाट मेयर भए पनि उनी गत वर्ष एमालेमा प्रवेश गरेका थिए।
प्रतिक्रिया लेख्नुहोस्:-