डोटी — मतपरिणाम सार्वजनिक भएका ४ पालिकामध्ये नेपाली कांग्रेसले दुई पालिकामा अध्यक्ष, उपाध्यक्षसहित विजयी भएको छ भने नेकपा एमाले र माओवादी केन्द्रले १र१ पालिकामा विजयी भएका छन् ।
नेकपा एमालेको सबैभन्दा बढी पकड क्षेत्र मानिने आदर्श गाउँपालिकामा नेपाली कांग्रेसले अध्यक्ष, उपाध्यक्षसहित ३ वडामा जीत हासिल गरेको छ । नेपाली कांग्रेसका गणेशबहादुर खड्काले अध्यक्ष र लक्ष्मी धामी रोकायाले उपाध्यक्षमा जितेका हुन् ।
बडीकेदार गाउँपालिकामा नेपाली कांग्रेसका भैरवबहादुर साउँद अध्यक्ष र डम्मरी कुमारी विष्ट उपाध्यक्षमा विजयी भएका छन् । कांग्रेसले बडीकेदारमा ५ मध्य २ वडा मात्र जितेको छ । सो पालिकामा यसअघि पनि कांग्रेसले जितेको थियो ।
नेकपा एमालेका दुर्गादक्त ओझा र जमुना बोहरा जोरायल गाउँपालिकामा दोस्रो कार्यकालका लागि समेत अनुमोदन भएका छन् । ३८ मतको अन्तरले कांग्रेसका दिपककुमार विष्टलाई हराउँदै एमालेका ओझा विजयी भएका हुन् । जोरायलमा कांग्रेसले दुई वडा जितेको छ भने ४ वडामा एमाले विजयी भएको छ ।
बोगटान फुडसिल गाउँपालिकामा पनि माओवादी केन्द्रका कमल गडसिला दोस्रो कार्यकालको अध्यक्ष पदका लागि निर्वाचित भएका छन् । यसअघि १ वडामात्र जितेको कांग्रेस यसपटक भने बोगटानमा ३ वडासहित उपाध्यक्षमा बिष्ना बम विजयी भएकी छन् ।
९ पालिका रहेको डोटीमा ५ पालिकाको मतगणना जारी छ । ५ वटै पालिकामा कांग्रेसले अग्रता लिएको छ ।
प्रतिक्रिया लेख्नुहोस्:-