काँग्रेसमा गुटको परकाष्ट ः आनन्दलाई दिएको टिकट यसरी खोसियो

पोखरा । रुपा गाउँपालिकाका अध्यक्षका आकाक्षी थिए रुपा ७ का आनन्द सुबेदी । मानोनयन दर्ता गराउने अन्तिम दिन सोमबार १२ बजेतिर सुबेदीको मोवाइलमा नेपाली काँग्रेस कास्की जिल्ला अध्यक्ष किशोरदत्त बरालको फोन आयो । बरालले सुबेदीले टिकट पाएको भन्दै उनलाई बधाइ दिए । सुबेदी जिल्लामा गएर टिकट लिएर जिल्ला सदस्य खेम गुरुङ संगै रुपा गाउँपालिकामा उम्मेदवारी दर्ता गराउन गए । उनी ढुक्क थिए अब चुनाब लड्नेमा सोही योजना अनुसार पार्टीको आधिकारीक सिफारिस पत्रसहित सबै कागजात लिएर उनी उम्मेदवारी मनोनयन गराउन पुगेका अनुभव सुबेदीले सुनाए ।

निर्वाचन कार्यालयमा पुग्दा असुरक्षीत महसुश

तर, उनलाई मनोनयन गर्ने ठाउँसम्म पुग्नै दिइएन् । उनलाई केही समयमा विभिन्न कारण देखाउदै रुपाकोटमा केही समय रोकियो र उनी निर्वाचन कार्यालय तर्फ लागे । सुबेदी विरुद्ध नारा लगाउदै निर्वाचन कार्यालय भन्दा ५ सय मिटर पर नै सुबेदीलाई आफ्नै पार्टीको कार्याकताले रोके । यसबाट ज्यानको सुरक्षामा समेत खतरा भएको महशुस गरेको सुबेदी सुनाउछन् ।

केहि व्यक्तिको अवरोध भएपनि सुरक्षा निकायको सहयोगले निर्वाचन कार्यालय भित्र प्रवेश गरे । उनले अध्यक्ष पदको लागि उम्मेदवारी दिनको लागि १ हजार ५ सय रुपैयाँको रसिद काटे । नियम अनुसार उनी उम्मेदवारी दर्ता गराउनको लागि निर्वाचन अधिकृतको संग पुगे । तर निर्वाचन अधिकृतले सुबेदीको उम्मेदवारी दर्ता गर्न मानेनन् । सुबेदीका अनुसार निर्वाचन अधिकृतले काँग्रेसको टिकट गिमायाले पाएउको फ्याक्स आएको भन्दै उनको काँग्रेसबाट उम्मेदवारी दर्ता गर्न मानेनन् ।

‘मलाई पहिला टिकट दिएर पठाईयो, सुबेदीले भने,‘फेरी मेरो विरुद्ध नै नारा लगाएर निर्वाचन कार्यालयमा प्रवेश गर्न रोकीयो अनि अर्केलाई टिकट किन दिइयो ।’ निर्वाचन अधिकृतले सुबेदीलाई स्वतन्त्र आए मात्र उम्मेदवारी दर्ता गराइने बताएको सुबेदीले सुनाए । ‘मैले त काँग्रेसको तर्फबाट उम्मेदवारी दिन गएको हुँ,‘उनले भने,‘काँग्रेस भन्दा बाहिर हुन म सक्दिन ।’

गिमाया गुरुङले ल्याइन टिकट

सुबेदीले जिल्लाबाट टिकट लगेपनि कांग्रेसको तर्फबाट गिमाया गुरुङले केन्द्रबाट नै टिकट ल्याइन । कास्की जिल्ला सभापति देखि रुपा गाउँपालिका पार्टी सभापति सबैले सुबेदीलाई बधाई समेत दिएका थिए । अध्यक्षका लागि संसदीय समितिमा दुई तिहाई मत प्राप्त गर्दै आफु अध्यक्ष पदका लागि मनोनयन हुदाँ पछि किन हटाइयो भन्ने कुरा सुबेदीले अझै बुझ्न सकिरहेका छैनन् ।

उनले आफुलाई किन हटाइयो भन्ने प्रश्नको जवाफ जिल्ला पार्टी सभापतिले दिनुपर्ने बताए । उनले आफुलाई हटाउनमा जिल्ला सभापति किशोरदत्त बराल र केन्द्रिय सह–महामन्त्री जिवन परियारको खेल रहेको अरोप समेत लगाए ।

‘टिकट जस्ले पाएपनि समस्या भएन । तर, किन हटाइयो भन्ने त स्पष्ट पार्नु प¥यो नि’ उनले भने,‘पार्टीले आधिकारीक रुपमा मनोनयन गरेको पत्र हुदाँ हुदँै किन हटाइयो ? यसको जवाफ भए पुग्छ । मलाई हटाउनमा भुमिका रुपाका सभापती , जीवन परियार र किशोरदत्त बरालको खेल रहेको छ ।’

उनले जिल्लाले प्रदेशलाई समेत खबर नगरि सिद्यैँ केन्द्रलाई पत्राचार गर्नुमा शंका लागेको बताए । प्रदेशलाई समेत वेवास्ता गर्दै जानकारी नदिनु गल्ती भएको र आफु टिकट नपाएकोमा असन्तुष्टि नभएको तर प्रक्रियाको विरोध गरेको उनले बताए ।

काँग्रेसमा नै बसेर राजनिती गर्छु

उनले यस्तो प्रवित्तिका कारण कांग्रेसको पतन हुने खतरा रहेको बताए । आफुले कांग्रेस भन्दा बाहिर राजनीति गर्न नसक्ने समेत बताए । निर्वाचनका लागि अध्यक्ष तथा उपाध्यक्षका लागि केहि सर्त लिएर सहयोग गर्ने समेत उनले बताए ।

उनले कांग्रेसलाई सिध्याउने र गुटको हाबि हुने चलखेल व्यापक भएको आरोप लगाए । यस विषयमा कास्की जिल्ला सभापति किशोरदत्त बरालसंग कुराकानी गर्न खोजेपनि उनले फोन भने उठाएनन् ।