पोखरा । कोरोना महामारीका कारण तीन वर्ष नेपाली सिनेमा थलियो । छायाँकन गरिएका चलचित्र समेत प्रदर्शन हुन पाएनन् । निर्माता, निर्देशक, कलाकार र प्राविधिकहरुको हरिबिजोग भयो । अहिले विस्तारै सिनेमा क्षेत्र चलायमान भएको छ । लामो समय ठप्प भएका चलचित्रहरु प्रदर्शन भइरहेका छन् । दर्शकको साथ समेत उत्तिकै पाएको महशुस हुन्छ । सिनेमा हलका संचालकमा समेत आशा जगाएको छ ।
ठूलो लगानीमा निर्माण भएका चलचित्रले सफलता पाएका छन् । विदेशी सिनेमासँगको प्रतिस्पर्धाका बाबजुत पनि उत्साह थपिएको आभाष हुन्छ । चलचित्रको कथावस्तु र अभिनय कला राम्रो भएको खण्डमा नेपाली चलचित्रलाई समेत दर्शकले रुचाउने भनाई निर्माता निर्देशकको सुनिन्छ ।
सिनेमा हलमा दर्शकको घुईचो देख्दा निर्माता निर्देशक खुशी देखिन्छन् । त्यसैले त पछिल्लो समय एक पछि अर्को सिनेमा रिलिज भइरहेको छ । केही समय अगाडी झरना थापा निर्देशित चलचित्र “ए मेरो हजुर—४” प्रदर्शन भयो । दक्षिण भारतिय चलचित्र “केजीएफ—२” सँग प्रतिस्पर्धा गरेको उक्त चलचित्रले सिनेमा हलमा कम समय पाएता पनि उल्लेखनिय व्यापार गरेको जानकारी निर्माण पक्षबाट नै प्राप्त भएको थियो ।
“म यस्तो गीत गाउँछु—२”, “ए मेरो हजुर—४” को सफलतापश्चात अब बैशाख २३ गते “लक्का जवान” चलचित्र प्रदर्शन हुँदैछ । जिरे खुर्सानीका कलाकार शिवहरि पौड्यालको निर्देशन तथा लेखनमा निर्माण भएको चलचित्रको बुधबार पोखरामा पत्रकार सम्मेलन गरियो । चलचित्र पत्रकार संघ कास्कीको समन्वयमा आयोजित सम्मेलनमा निर्देशक पौड्यालले चलचित्रलाई दर्शकले मन पराउनेमा आशावादी देखिन्छन् । ७० प्रतिशत हास्यव्यङ्गय कथा वस्तुमा निर्माण भएको चलचित्र भएकाले पनि लक्का जवान चलचित्र दर्शकको रोजाईमा पर्ने विश्वास उनको छ ।
ध्रुव वन्तको लगानीमा निर्माण भएको चलचित्रमा नायक दिलिप रायमाझी, सलोन बस्नेत, प्रियंका कार्की, वर्षा शिवाकोटी, मदन कृष्ण श्रेष्ठ, किरण केसी, सरोज खनाल लगायतका कलाकारको प्रमुख अभिनय छ । चलचित्र विशुद्ध नेपाली बनेको दाबी गर्छन् कार्यकारी निर्माता समेत रहेका किरण केसी । “नेपाली मौलिकतामा आधारित चलचित्र बनेको छ”, उनले भने, “तपाई हाम्रै गाउँ समाजमा घटेका घट्नाको कथावस्तु चलचित्रमा पाउनुहुन्छ ।”
चलचित्रका नायक दिलिप रायमाझीले लामो समयको अन्तर पश्चात आफुले राम्रो सिनेमामा अभिनय गर्ने अवसर पाएको बताए । उनले उक्त चलचित्र आफुले सम्बन्धका आधारमा नभई कथावस्तुले नै खोजेको क्यारेक्टरका आधारमा प्राप्त गरेको दाबी गरे । चलचित्रमा आफ्नो अभिनयले दर्शकको साथ पाउनेमा उनी विश्वस्त छन् ।
यस्तै विश्वास चलचित्रका अर्का नायक सलोन बस्नेतलाई समेत छ । बाल्यकालमा कलाकार किरण केसीसँग अभिनय गरेका सलोनले लामो समयको अन्तरमा उनीसँग सहकार्य गर्ने अवसर पाएका हुन् । तपाई जहिले सर्पोटिङ रोलमा अभिनय गर्नुहुन्छ, तपाईको उक्त रोललाई मन समेत पराइन्छ तर मुख्य रोल खासै पाएको देखिदैन भन्ने एक पत्रकारको प्रश्नमा सलोनले आफु एक कलाकार भएकाले रोलका पछाडी नदौडिने अभिव्यक्ति दिए । उनले भने,“म एक कलाकार हुँ । रोल भन्दा पनि क्यारेक्टरमा विश्वास गर्ने भएकाले मलाई सर्पोटिङमा अभिनय गर्ने सलोन भन्दा फरक पर्दैन । मेरो पेशा भनेको कलाकारिता हो र म कलाकार हुँ यति नै परिचय भए पुग्छ ।”
प्रतिक्रिया लेख्नुहोस्:-