पोखरा । सामान्यताः फिफाद्धारा मान्यता प्राप्त संघ संस्थाले आयोजना गर्ने खेलमा डाक्टर सहितको मेडिकल टिम हुनुपर्छ । हरेक क्लबको आफ्नै फिजियोथेरापिष्ट हुन्छ त्यो बाहेक आयोजकले समेत मेडिकलको प्रबन्ध मिलाएको हुन्छ ।
मेडिकल टिमसंग प्राथमिक उपचारको किट हुन्छ । खेल दौरान रेफ्रीले मेडिकल बोलाएको खण्डमा सोही किट लिएर जानुपर्ने हुन्छ । तर पोखरामा जारी २२ औं आहा रारा पोखरा गोल्डकपमा भने मेडिकल टिम पानी र स्प्रे मात्रै बोकेर मैदान पुग्ने गरेका छन् । खेल विज्ञका अनुसार प्रतिष्ठित प्रतियोगितामा त्यो कम्जोरी सामान्य होइन् ।
खेल दौरान खेलाडी मैदानमा लडेमा मुख्य रेफ्रीले घटनाको प्रकृति हेरेर निर्णय लिने गर्छ । सामान्य अवस्था भएमा खेलाडीलाई सम्झाउने अर्थात काउन्सिलिङ गर्छ त्यो बाहेक अन्य अवस्थामा मेडिकल बोलाउने, स्टेचर वा एम्बुलेन्स ल्याउने भन्ने संकेत गर्छ ।
जसका लागि खेल अधिकृतले सबै कुरा ठीक छ वा छैन हेर्नुपर्छ । पोखरा रंगशालामा बिहिबारदेखी सुरु भएको खेलको ६९ औं मिनेटमा धरानका खेलाडी मैदानमा लडे । रेफ्रिले मेडिकल टिम बोलाए तर मेडिकल टिमले पानीको बोतल र स्प्रे मात्रै लिएर मैदान प्रवेश गरे ।
यस्तै ८८ औं मिनेटमा सहाराका अमिन रिवाल र धरानका मनोज राई ठोक्किन पुगे । उनीहरु दुवै मैदानमा लडे । रेफ्रीले मेडिकल बोलायो त्यहाँ पनि फेरी उहि दोहोरियो पानी र स्पे्र । खेलको ३९ औं मिनेटमा पुलिका करण रावत र चर्च ब्वाइजका संजित राई एक आपसमा ठोक्किए उनीहरु मैदानमा लडेपछि मेडिकल बोलाउँदा पानी र स्प्रे बोकेर मैदान प्रवेश गरे । चर्च ब्वाइजका अञ्जन घाइते हुन पुगे उनको खुट्टाको फिलामा चोट लाग्यो ।
चर्च ब्वाइजमा आफ्नै फिजियो थियो जसले मेडिकल किट बोकेरै मैदान प्रवेश गरेका थिए । आयोजकको मेडिकल टिम जादाँ भने पानी र स्प्रे मात्रै बोकेर मैदान प्रवेश गरेका थिए ।
यस्तै नेपाल पुलिस क्लब र चर्च ब्वाइज बीचको खेलमा समेत उही घटना दोहोरियो । खेलाडी मैदानमा लडेपछि रेफ्रीले मेडिकल बोलाउँदा पानी र स्प्रे मात्रै बोकेर पुगे । उनीहरु प्राथमिक उपचारका सामग्री हुँदाहुँदै पनि नलिइन जाने गरेका छन् ।
खेल अधिकृत कृष्ण थापाले भने गैरजिम्मेवारी जवाफ दिए । उनले माइनर इन्जुरी भएको कारण पानी र स्प्रेले नै काम गर्ने बताए । ‘सिरियस इन्जुरी, माइनर वा मजेर इन्जुरी भन्ने हुन्छ ।
त्यो माइनर इन्जुरी हो । त्यसमा उसले डाक्टरलाई बोलायो । त्यो हेरिसकेपछि यदि सिरियस भयो भने तुरुन्त उनीहरुले अर्को इन्डिकेट बोलाउँछ ।
नर्मल अवस्था थियो । बक्स लाने स्थिति थिएन त्यहाँ । त्यहि भएर नलगेको हो ।’ उनले भने उनको उत्तरले घाइते भएमा मात्रै अन्य मेडिकलका सामान लैजाने भन्ने दर्सायो । रेफ्रीले बोलाइसकेको अवस्थामा प्राथमिक उपचारका सबै सामान लानुपर्ने हुन्छ तर खेलमा त्यसो भने देखिएन् ।
गण्डकी विश्वविधालयका खेलकुद संकाय विभाग प्रमुख डा. मधुसुदन सुवेदीले रेफ्रीले संकेत गरिसकेपछि मेडिकल किट लिएरै जानुपर्ने बताए । उनले प्रोफेसनल खेलहरुमा मेडिकल किट अनिवार्य हुनुपर्ने सुनाए । ‘मेडिकल किट अनिवार्य हुनुपर्छ । खेलाडीको अवस्था बाहिरबाट थाहा हुँदैन् ।
मैदानमा मेडिकल बोलाएपनि प्रोफेसनल गेममा मेडिकल किट लैजानै पर्छ’ उनले भने,‘खेलको मर्म अनुसार कस्तो अवस्थाको घाइते भन्ने हुन्छ । ठूला खेलमा सबै कुराको व्यवस्थापन गर्नुपर्छ जुन अन्तर्राष्ट्रिय मान्यता हो ।’ उनले स्थानीय टोलेकपमा जस्तो बोतल र पानीमात्रै बोकेर जानु स्तरीय प्रतियोगितामा गलत रहेको बताए ।
‘स्प्रे र पानी मात्रै लैजाने लोकल गेममा हो । व्यवस्थित गेममा त्यस्तो हुँदैन । क्लबको आफ्नै मेडिकल छ भने राम्रो नभए आयोजकले त्यसको व्यवस्थापन गर्नुपर्छ ।’ उनले भने ।
प्रतियोगिता गर्दा क्लबले फिजियो राख्ने व्यवस्था हुन्छ । तर आयोजकले डाक्टरसहितको मेडिक टिम राख्नुपर्ने हुन्छ । खेल दौरान रगत आउने गरी चोटपटक लागेमा मेडिकल डाक्टरले मात्रै उपचार गर्न पाउँछ । सहारा क्लबले ११ जनाको मेडिकल टिम राखेको छ ।
प्रतिक्रिया लेख्नुहोस्:-