दुर्घटनामा ९ जनाको मृत्यु

काठमाडौं । महोत्तरी, बारा, प्यूठान, रुकुम (पश्चिम), झापा, बाँके र दाङका छुट्टाछुटै स्थानमा भएको सवारी दुर्घटनामा परी ९ जनाको मृत्यु भएको छ ।

महोत्तरी, महोत्तरी गाउँपालिका ६ गोरिगामास्थित सडकमा प्र २-०२-००१ त ००६४ नम्बरको सेफ्टी ट्याङ्की जडान गरेको टयाक्टर आफैँ अनियन्त्रित भई आइतबार दिउँसो दुर्घटना हुँदा ट्याक्टर चालक एकडारा गाउँपालिका ५ बहेरा बस्ने १८ वर्षीय सरोज डोमको घटनास्थलमै मृत्यु भएको छ । साथै दुर्घटनामा घाइते भएका टयाक्टरका सचालक सोही ठाउँ बस्ने ३० वर्षीय सत्रुधन महतोको उपचारको लागि जनकपुरतर्फ पठाइएको छ ।

बारा, पचरौता नगरपालिका ८ लंगडाचोक डोर पुलस्थित सडकमा प्रदेश नम्बर २-०३-०१४ प ४०१६ नम्बरको मोटरसाइकलबाट खसेर मोटरसाइकलमा सवार रौतहट ईशनाथ नागरपालिका २ औरैया टोल बस्ने ३० वर्षीया मिना देवीको आइतबार दिउँसो मृत्यु भएको छ । मोटरसाइकलबाट खसेर गम्भीर घाइते भएका उनको न्यूरो अस्पताल वीरगंजमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।

प्यूठान, प्यूठान नगरपालिका ४ बिजुवारस्थित सडकमा रा १ क ८८१ नम्बरको बसको ठक्करबाट सोही ठाउँ बस्ने बिकाश कार्कीको १५ महिनाको छोरा युनिक कार्कीको आइतबार दिउँसो मृत्यु भएको छ । ठक्करबाट गम्भीर घाइते भएका उनको जिल्ला अस्पताल बिजुवारमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।

रुकुम (पश्चिम), आठबिकोट नगरपालिका ४ तिल भन्ने स्थानमा भे २ त ५४ नम्बरको ट्याक्टर अनियन्त्रित भई सडकबाट करिब १ सय मिटर तल खसेर आइतबार दिउँसो दुर्घटना हुँदा ट्याक्टर चालक सोही नगरपालिका ६ बस्ने ३९ वर्षीय मोति प्रसाद खड्काको घटनास्थलमै मृत्यु भएको छ ।

झापा, बिर्तामोड नगरपालिका २ रामचोकस्थित सडकमा ना ६ ख ६४५५ नम्बरको ट्रकले बा १५ प ८२०२ नम्बरको मोटरसाइकललाई आइतबार राति ठक्कर दिँदा मोटरसाइकल चालक सोही नगरपालिका २ बस्ने २९ वर्षीय संयम बजगाईँको मृत्यु भएको छ । ठक्करबाट गम्भीर घाइते भएका उनको बिएण्डसी अस्पताल बिर्तामोडमा उपचारको क्रममा मृत्यु भएको हो । हाल फरार ट्रक चालकको प्रहरीले खोजी गरिरहेको छ ।

बाँके, नेपालगंज उपमहानगरपालिका ११ बिपि चोकस्थित सडकमा प्रदेश नम्बर ३-०१-०२३ च ८४८१ नम्बरको कारको ठक्करबाट ३ जना पदैलयात्रीको आइतबार राति मृत्यु भएको छ । मृत्यु हुनेहरुमा सोही उपमहानगरपालिका ११ सोनारमण्डी बस्ने ६५ वर्षीया समिना ईद्रिसी, अस्लाम अन्सारीको ५ वर्षीय छोरा अली अन्सारी र अजिम ईद्रिसीको ५ बर्षीय छोरा कलिम ईद्रिसी रहेका छन् । ठक्करबाट गम्भीर घाइते भएका उनीहरुको नर्सिङ होम नेपालगंजमा उपचारको क्रममा मृत्यु भएको हो । कार चालकलाई प्रहरीले नियन्त्रणमा लिएको छ ।

दाङ, घोराही उपमहानगरपालिका ७ नागडाँडास्थित सडकमा रा ५ प ५१८५ नम्बरको मोटरसाइकल रा १ त ४६७८ नम्बरको ट्याक्टरमा ठोक्किएर आइतबार राति दुर्घटना हुँदा मोटरसाइकल चालक सोही उपमहानगरपालिका १६ बयरडाँडा बस्ने २२ वर्षीय निसान्त चौधरीको मृत्यु भएको छ । दुर्घटनामा गम्भीर घाइते भएका उनको राप्ति स्वास्थ्य बिज्ञान प्रतिष्ठान घोराहीमा उपचारको क्रममा मृत्यु भएको हो । साथै दुर्घटनामा घाइते भएका अन्य २ जनाको सोही अस्पतालमा उपचार भइरहेको छ । ट्याक्टर चालकलाई प्रहरीले नियन्त्रणमा लिएको छ ।