पोखरा । कास्कीको पोखरा महानगरपालिका–६ लेकसाइडस्थित बाराही होटल नजिक सामान्य विवादका क्रममा झगडा हुँदा एक युवकमाथि चक्कु प्रहार भएको छ।
२६ गते राति करिब १:०० बजे भएको उक्त घटनामा अन्नपूर्ण गाउँपालिका–१ निवासी ३६ वर्षीय कृष्ण प्रसाद अधिकारी घाइते भएका छन्।
सामान्य विवादले उग्र रूप लिँदा लेकसाइडमा बसोबास गर्ने तीन जना व्यक्तिहरूले अधिकारीमाथि चक्कु प्रहार गरेका थिए। घटना लगत्तै हलनचोकस्थित सीआरभी टोली प्रहरी सहायक निरीक्षक कमल बहादुर क्षेत्रीको कमाण्डमा खटिएको थियो।
प्रहरी टोलीले घाइते अधिकारीलाई तत्काल उद्धार गरी उपचारका लागि गण्डकी मेडिकल कलेज पठाएको जनाएको छ। चिकित्सकका अनुसार उनको टाउको तथा बायाँ हातको कान्छी औँलामा चोट लागेको भए पनि अवस्था सामान्य रहेको छ।
घटनामा संलग्न तीनै जना आरोपितलाई प्रहरीले नियन्त्रणमा लिएको छ। पक्राउ पर्नेहरूमा पोखरा–६ लेकसाइड बस्ने २० वर्षीय नवीन कुमाल, १६ वर्षीय सुनिल तामाङ र २२ वर्षीय सन्तोष श्रेष्ठ रहेकाे जिल्ला प्रहरी कार्यालय कास्कीका प्रमुख एसपी नवीन कार्कीले जानकारी दिए ।
नियन्त्रणमा लिइएका उनीहरूलाई थप अनुसन्धान तथा आवश्यक कानुनी प्रक्रिया अगाडि बढाउन वडा प्रहरी कार्यालय बैदाम पठाइएको प्रहरीले जनाएको छ।
प्रतिक्रिया लेख्नुहोस्:-