सुटकेशमा महिला मृत प्रकरण : झुण्डीएर मृत्यु पछि काटेर सुटकेशमा हालियो, झनै रहस्य बन्दै घटना

विजय नेपाली / गएको फागुन १७ गते पोखरा १७ तितेपानीस्थित पार्दी खोलामा तन्नाले बेरिएको सुटकेश देखियो । शंकास्पद देखेपछि स्थानीयले प्रहरीलाई खबर गरे । प्रहरीले सुटकेश खोलेर हेर्दा त्यहाँ विभत्स दृश्य देख्यो ।

एक महिला जसलाई काटेर सुटकेशमा राखिएको थियो । प्रहरीले तत्कालै प्रारम्भिक रुपमा हत्याको अनुमान ग¥यो । घटनाको मुचुल्का पश्चात प्रहरीले खोजतलासी गर्दा अर्को तथ्य बाहिर आयो ।

एक पुरुषले सुटकेश बोकेर मोटरसाइकलमा राख्दै गरेको । उक्त सिसिटिभि फुटेजले समेत स्पष्ट पा¥यो कि महिलाको हत्या भएको भन्ने तर, घटनाको वास्तविकता भने फरक छ । महिलाको हत्या भएको भएपनि यो हत्या फरक किसिमले हुन पुगेको देखिन्छ ।

घटनाबारे प्रहरीले चैत ६ गते पत्रकार सम्मेलन गरि १ जना पक्राउ गरेको बतायो । तर, पोस्टमार्टम रिपोर्ट प्राप्त गरिसकेको प्रहरीले रिपोर्ट आउन बाँकी रहेको भन्दै रिपोर्ट लुकाएको छ । रिपोर्टमात्र होइन एक जना पक्राउ परेको जानकारी गराएपनि उनको परिचय समेत गोप्य राखेको छ ।
के देखिन्छ पोष्टमार्टम रिपोर्टमा ?
प्रहरीको प्रारम्भिक अनुसन्धानमा हत्या नै ठहरिएको छ । तर, घटनामा केही नयाँ रहस्य बाहिर आएको छ । त्यो हो महिलाको मृत्यु झुण्डिएर भएको । स्रोतका अनुसार यो नयाँ रहस्यले प्रहरीलाई समेत अलमलमा पारिदिएको छ । घटनाको दृश्य हेर्दा महिलाको घाटी काटिएको छ, शरिरका विभिन्न भागमा धारिलो हतियार प्रयोग भएको छ । जसका कारण हत्या नै हो भन्ने देखिन्छ । यद्यपि पोष्टमार्टम रिपोर्टले मृत्युको कारण अर्कै देखाएको छ । प्रहरीलाई प्राप्त रिपोर्ट अनुसार मृत्युको कारण ‘ह्यांगिङ’ अर्थात् झुण्डिइ’ भन्ने देखिएको छ ।
महिलालाई पहिला झुण्ड्याएर हत्या गरेको वा महिला आफै झुण्डिएर आत्महत्या गरेको भन्ने पुष्टि चाँहि भएको छैन । यसले प्रहरीको अनुसन्धान अब फरक शैलीबाट गर्नुपर्ने देखिएको छ । प्रहरी स्रोतका अनुसार महिलाको झुण्डिएर मृत्यु भएपछि आफु फस्ने डरले काटेर सुटकेशमा राखेर फालिएको हुन सक्छ । प्रारम्भिक रिपोर्टले पनि के स्पष्ट हुन्छ भने यदि महिलालाई आत्महत्या नै गर्न बाध्य बनाएको भन्ने । तर, घटनामा संलग्नले क्रुरता प्रयोग गरेका छन् ।

त्यतिमात्र होइन नग्न अवस्थामा सुटकेशमा फेला परेको महिला महिनावारी भएको समेत पुष्टि भएको छ । सुरुवातमा बलात्कार पछि हत्या भएको आशंका गरेपनि बलात्कार नभएको देखिन्छ । तर, हत्याको रहस्य भने अझै खुलेको छैन् ।
घटनामा संलग्न एक पक्राउ
अनुसन्धानमा खटिएको प्रहरीको टोलीले १ जनालाई पक्राउ गरेको छ । २१ गते प्रहरीले एक जनालाई पक्राउ गरेको हो सिसिटिभि फुटेजमा २ जना देखिएको छ । फागुन १७ गते विहानको ४ बजेर १० मिनेट ३३ सेकेन्डमा सुटकेश घिसारेर बाहिर निकालेको देखिन्छ ।

कुन लटको यकिन नभएपनि मोटरसाइकलको नम्बर भने स्पष्ट देखिएको छ । ५९२४ नम्बरको मोटरसाइकलसम्म पु¥याएको देखिन्छ । तर, अन्य सिसिटिभि फुटेज भने बाहिरिएको छैन् । घटनास्थलमा पुरुषको भारतको सिलगुडीको आधार कार्डसमेत फेला परेको छ ।
अझै खुलेन महिलाको पहिचान
गहुँगोरो मझौला शरीर बाटुलो मोहडा भएकी ती महिलाको अझै पहिचान खुल्न सकेको छैन । घाँटिमा विनोद लेखिएको ट्याटु खोपिएको छ भने बायँ हातमा ‘महाकाल’ र आधा शिव जी र आधा त्रिशुल खोपिएको छ ।

अन्दाजी २२–२५ वर्षको देखिने महिला को हुन भन्ने खुल्न सकिरहेको छैन् । महिलाको हत्या हुनु एक महिनाअघि मात्रै त्यहाँ ती महिला र एक पुरुष श्रीमान–श्रीमतीको रुपमा बस्न आएको खुलेको छ ।
अझै मुख्य आरोपी फरार
प्रहरी स्रोतका अनुसार घटनामा संलग्न मुख्य व्यक्ति अझै फरार रहेको छ । प्रहरीले संलग्न व्यक्तिको पहिचान खोजिरहेको छ तथापि पक्राउ गर्न भने सकिरहेको छैन् ।

घटना लगत्तै फरार भएपछि सिमानाका पुगेपछि ती व्यक्तिको मोबाइल अफ भएको छ । उनी नेपालमै छन वा भारततर्फ फरार भए त्यो पनि बाहिरिएको छैन् ।