पोखरा । पोखरा महानगरपालिकामा बुधबार केहि हुल आएर हो हल्ला गरे । रिस्सिदै आएका उनीहरु महानगरमा आफ्नो समयस्या राखेको पनि महिनौ वितिसकेको रहेछ । लामो समयसम्म पनि केहि न्याय नपाएपछि पुनः महानगर घेराउ गर्ने हेतुले महानगर आए । उनीहरुलाई साम्य पार्दै पोखरा महानगरपालिकाका मेयर धनराज आचार्यले बैठक कक्षमा लगे र गुनासो सुने । त्यो भिड थियो पोखरा महानगरपालिका ४ नालामुख मार्ग सूर्यदर्शन बचत तथा ऋण सहकारी संस्थामा बचत गर्न आउनेहरुको ।
विगत ६ महिनादेखी उनीहरुले सहकारीबाट रकम निकाल्नै नपाएको रहेछन् । सोही भिडमा थिए बैशाखी टेकेका नेत्रपाणी सुवेदी । उनको ढाड भाचिएको हो । २०६२/०६३ सालमा भएको जनआन्दोलनको बेलामा प्रहरीको कुटाइबाट घाइते भएका उनी अहिले बैशाखीको सहायताले हिड्न बाध्य छन् ।
कास्कीकोट घर भई हाल पोखरा ६ बस्दै आएका उनले औषधी खाने रकम सहकारीमा लगानी गरे । सूर्यदर्शन सहकारीमा उनले औषधी खानका लागि राखेको १२ लाख रुपैयाँ लगानी गरे । तर ६ महिनादेखी उनले रकम निकाल्न पाएका छैनन् । ‘सुर्यदर्शन भन्ने सहकारीमा हामीले लगानी गरेका हौं । यो सहकारीले अरब होइन खरब पैसा खाएको छ ।
यसमा लगानी र बचत गर्ने बचतकर्ता धेरै छन् । सबैको पैसा खाएको छ’ उनले भने, ‘ म जनआन्दोलनमा घाइते भएको व्यक्ति हुँ मैले औषधि खान जम्मा गरेको १२ लाख रुपैयाँ यीनिहरुले आइदिए । मलाई सरकारले हेर्दैन । नेता सबै सामन्त हुन् ।’ उनले उक्त सहकारीमा ९ हजार आसपासमा बचत तथा लगानीकर्ता रहेको बताए । उनले सहकारी संचालक राजनैतिक संरक्षणमा रहेको आरोप समेत लगाए । ‘यी व्यक्तिहरु (संचालक समिति) नेताको संरक्षणमा छन् ।
नेताको संरक्षण विना यतिधेरै रकम लुकाउन सक्दैनन् ।’ उक्त सहकारीको संचालक डिबी राई रहेका छन् । उनीसंग रकम माग्न जाँदा तिमिहरुलाई जे पनि गर्न सक्छु भन्दै धम्की दिने गरेको उनले बताए । ‘डिबी राई संग सम्पर्क भयो भने पैसा माग्न जादाँ जे पनि गरिदिन सक्छु भनेर धम्की दिदाँ रहेछन् त्यो रेकर्ड नै छ रे’ चुप लगाएर बस भन्छन रे’ उनले भने ।
यस्तै जिवन विमा गर्नका लागि रकम जम्मा गर्दै आएकी पोखरा १ बगरकी एक महिलाले लामो समयदेखी रकम निकाल्न नमिलेको बताइन् । उनले छोराछोरीको जिवन विमाका लागि सुर्यदर्शनमा रकम बचत गर्दै आएको सुनाइन् । ‘धेरै भयो हामीले पैसा लिन पाएका छैनौं । पहिला त पैसा लिन आउँथे आजकल त आउन पनि छाड्यो’ उनले भनिन्, ‘संचालक भाग्यो भन्छन् । मैले बल्ल थाहा पाए । हामी त केहि कारणले मिलेन होला भन्ने ठानेका थियौं तर यहाँ कुरा अर्कै रहेछ ।’
राज्यनै उनीहरुको संरक्षणमा लागेको उनीहरुको आरोप छ । महानगरलाई यो विषयमा जानकारी गराउँदा प्रक्रियामा रहेको भन्दै लम्ब्याउने काम मात्रै गरेको उनीहरुले सुनाए ।
उनीहरुसंगको छलफलमा मेयर धनराज आचार्यले संचालक समितिको गल्ति रहेको बताए । उनले उक्त संचालक समितिले नागरिकको लगानीलाई अन्यत्र लगानी गरेको कुरा सुन्नामा आएको समेत सुनाए । यस्तै आचार्यले बचत तथा लगानीकर्तालाई झुक्याउन डमी संचालक समिति बनाउने काम गरेको समेत बताए ।
‘संचालक समितिको केहि न केहि कैफियत पक्कै छ । डमि संचालक समिती बनाउने अनि भाग्ने गर्न खोजेको सुनेको छु । हामीले सुर्यदर्शन सहकारीको नाममा भएको चल अचल सम्पत्ति रोक्का गर्न लगाएक छौं’ आचार्यले भने, ‘उनीहरुको लगानी एउटा टेलिभिजनमा समेत छ भन्ने कुरा आएको छ । कहाँ लगानी गरेको छ थाहा भएन । आज आउने भन्न्ने थियो । यहाँ फेस गर्न सकिन्न भनेर पनि नआएको होला ।’ मेयर आचार्यले उनीहरु भाग्ने स्थिती नबनाउन भन्दै व्यक्तीभन्दा पनि सम्पत्ती खोज्न तर्फ लाग्नुपर्ने बताएका थिए ।
केही महिनाअघि भएको संस्थाको साधारण सभा समेत नाटकीय रहेको बचत तथा लगानीकर्ताको आरोप छ । उक्त साधारणसभा समेत विवादित बनेको एक बचत कर्ताले बताए । पिडित मध्येकै एकजनाले तत्कालिन गृहमन्त्री लवि लामिछानेको डर देखाउँदै सार्वजानिक रुपमै धम्की दिएको समेत बताए । ‘विरोध गर्दा त धम्किनै दिएको थियो । जुन कुरा हामीले महानगरमा समेत आज (बुधबार ) राख्यौं । सबैको अगाडी नै तिमिहरुलाई जेपनि गर्न सक्छौ । भन्दै हामीलाई थर्काएको थियो ।’ राष्ट्रिय स्वतन्त्र पार्टी (रास्वपा) अध्यक्षले खोलेको टेलिभिजनमा समेत लगानी रहेको उनले बताए ।
महानगरले पिडितको तर्फबाट पाँच जनाको समिति बनाएर महानगरमै छलफल गरेको र एक हप्ताभित्र नतिजा आउने गरी काम गर्ने प्रतिबद्धता दिएको एक पिडितले बताए । महानगरको उक्त बैठकमा राज्यको संयन्त्र प्रयोग गर्ने बताएको उनले सुनाए ।
प्रतिक्रिया लेख्नुहोस्:-