पोखरा । रसुवा बाढीका कारण विभिन्न जिल्लाका नदी किनारमा फेला परेका तथा पहिचान खुल्न नसकेका ८१ शवको कास्कीमा व्यवस्थापन गरिएको छ। तीमध्ये ७६ शव यसअघि नै व्यवस्थापन गरिएकोमा अस्पतालमा होल्डमा राखिएका थप पाँच शव पनि पछि व्यवस्थापन गरिएको हो।
जिल्ला प्रहरी कार्यालय कास्कीका अनुसार २०८३ साल भदौ १० गते भोटेकोसी नदीमा आएको बाढीपछि गोरखा, तनहुँ, धादिङ र नवलपरासी (बर्दघाट सुस्ता पूर्व) जिल्लाका त्रिशूली तथा नारायणी नदी किनारमा फेला परेका शवहरू कास्की ल्याइएको थियो।
कास्कीमा ल्याइएका १०२ शवमध्ये २१ शवको पहिचान तथा सनाखत भएपछि आफन्तले बुझेर लगेका छन्। धादिङबाट प्राप्त चार, नवलपरासी पूर्वबाट १२, गोरखाबाट चार र तनहुँबाट प्राप्त एक शव आफन्तले बुझेका थिए।
पहिचान हुन नसकेका ७६ शव पोखरा महानगरपालिका–१६, उपल्लो दीप सिसौघारीस्थित सिँचाइको सरकारी जग्गामा व्यवस्थापन गरिएको हो । व्यवस्थापन गरिएका शवमध्ये धादिङबाट २२, गोरखाबाट ७, नवलपरासी पूर्वबाट २५ र तनहुँबाट २२ वटा रहेका छन्।
त्यसपछि पश्चिमाञ्चल क्षेत्रीय अस्पतालमा होल्डमा रहेका थप पाँच शव पनि व्यवस्थापन गरिएको छ। जिल्ला प्रहरी कार्यालय कास्कीबाट प्रहरी निरीक्षक टेकप्रसाद सुवेदीको कमान्डमा २० जनाको टोली खटिएर ती शव व्यवस्थापन स्थलमा लगेको थियो।
होल्डमा रहेका पाँच शवमध्ये दुई महिला, दुई पुरुष र एक बालक रहेका थिए। उनीहरूको शव व्यवस्थापन दिउँसो २ः५५ बजे सुरु गरी ३ः२८ बजे सम्पन्न गरिएको प्रहरीले जनाएको छ।
प्रहरीका अनुसार प्राकृतिक विपत्तिपछि नदी किनारमा फेला परेका तथा लामो समयसम्म पहिचान खुल्न नसकेका शवलाई सम्बन्धित प्रक्रिया पूरा गरी व्यवस्थापन गरिएको हो।
प्रतिक्रिया लेख्नुहोस्:-