अस्पतालको रकम हिनामिना प्रकरणमा बैंक र अस्पतालका ५ जना पक्राउ

कपिलवस्तु / शिवराज नगरपालिकाअन्तर्गत रहेको आधारभूत स्वास्थ्य सेवा अस्पताल चन्द्रौटामा आर्थिक अनियमितता (रकम हिनामिना) भएको घटनामा संलग्न पाँच जनालाई प्रहरीले पक्राउ गरेको छ।
जिल्ला प्रहरी कार्यालय कपिलवस्तुका अनुसार आर्थिक वर्ष २०८१/०८२ मा अस्पतालको सेवा शुल्क तथा फार्मेसीबाट औषधि बिक्रीबाट संकलित रकम बैंकमा जम्मा नगरी हिनामिना गरिएको उजुरी परेपछि अनुसन्धान सुरु गरिएको थियो।
अनुसन्धानका क्रममा विभिन्न मितिका भौचरका आधारमा जम्मा हुनुपर्ने करिब ३८ लाख ११ हजार रुपैयाँ नेपाल बैंक लिमिटेड चन्द्रौटा शाखामा जम्मा नभएको पाइएको प्रहरीले जनाएको छ। प्रारम्भिक अनुसन्धानले नक्कली भौचर प्रयोग गरी रकम हिनामिना गरिएको देखिएको छ।
प्रहरीले घटनामा संलग्न अस्पताल तथा बैंकसँग सम्बन्धित ५ जनालाई पक्राउ गरी ठगी तथा आपराधिक विश्वासघातसम्बन्धी कसुरमा जिल्ला अदालतबाट ७ दिनको म्याद थप गरी थप अनुसन्धान अगाडि बढाएको जनाएको छ।
पक्राउ पर्नेहरूमा अस्पतालका स्वास्थ्य शाखा प्रमुख चुडामणि भट्टराई , मेडिकल सुपरिटेन्डेन्ट अमित पाण्डेय, नेपाल बैंकका क्यासियर कमल प्रसाद भण्डारी , फार्मेसी सहायक रुकसना खातुन तथा नेपाल बैंकका कर्मचारी बिक्रम केसि समेत रहेका छन्।

यस घटनाबारे थप अनुसन्धान भइरहेको प्रहरीले जानकारी दिएको छ।