पोखरा, बैशाख २६ (मे ८) जलवायु परिवर्तन र समुद्री पारिस्थितिक प्रणालीमा बढ्दो चुनौतीलाई मध्यनजर गर्दै पोखरामा विशेष वातावरणीय सचेतना तथा सरसफाई अभियान सञ्चालन गरिएको छ।
परमेश्वरको मण्डली विश्व सुसमाचार समाजसँग आबद्ध विश्वविद्यालय विद्यार्थी स्वयंसेवक समूह ASEZ ले बिहीबार पोखरा नर्सिङ क्याम्पस र पश्चिमाञ्चल क्षेत्रीय अस्पताल वरिपरि ‘विश्वव्यापी निलो कार्बन (Blue Carbon) पारिस्थितिक प्रणाली संरक्षण पहल’ अन्तर्गत यो कार्यक्रम आयोजना गरेको हो।
समुन्द्री वनस्पति र पारिस्थितिक प्रणालीले सोस्ने कार्बन (निलो कार्बन) को महत्त्व बुझाउन र प्लास्टिक प्रदूषण कम गर्न यो अभियान सञ्चालन गरिएको आयोजकले जनाएको छ। संयुक्त राष्ट्रसङ्घीय वातावरण कार्यक्रम (UNEP) का अनुसार ८० प्रतिशत समुद्री प्लास्टिकको स्रोत जमिन नै हुने भएकाले, सहरी क्षेत्र र शैक्षिक संस्थाहरूबाट हुने उत्सर्जन रोक्न यो पहल सुरु गरिएको हो।
१२० स्वयंसेवकको सक्रियता बिहानैदेखि सुरु भएको यस अभियानमा पोखराका विभिन्न क्याम्पसका करिब १२० जना विद्यार्थी स्वयंसेवकहरू सहभागी थिए। उनीहरूले पश्चिमाञ्चल क्षेत्रीय अस्पतालको पार्कबाट सुरु गरी नर्सिङ क्याम्पस र अस्पताल मार्गसम्मको सडक खण्डबाट प्लास्टिकका बोतल, कप, झोला र अन्य नसड्ने फोहोरहरू सङ्कलन गरेका थिए।
कार्यक्रममा सहभागी विद्यार्थी सगुन मगरले भन्नुभयो, “यस्ता अभियानले युवाहरूमा समाज र वातावरणप्रति उत्तरदायित्वको भावना विकास गर्छ।” त्यस्तै, प्यानल प्रदर्शनीमार्फत सचेतना फैलाएकी कृतिका राईले वातावरण जोगाउन सबैको सामूहिक प्रयास आवश्यक रहेको बताए ।
स्थानीय जनप्रतिनिधिको समर्थमा कार्यक्रममा उपस्थिति जनाउँदै पोखरा महानगरपालिका वडा नम्बर ११ का वडा अध्यक्ष प्रेमप्रसाद कर्माचार्यले विद्यार्थीहरूको यो कार्यको प्रशंसा गरे । उनले भने, “ASEZ का विद्यार्थीहरूले गरेको यो प्रयासले आम नागरिकलाई वातावरण संरक्षणमा लाग्न ठूलो प्रेरणा दिनेछ।”
विश्वव्यापी र स्थानीय प्रभाव ASEZ का एक अधिकारीका अनुसार, यो अभियान अप्रिलको मध्यदेखि आगामी ‘विश्व महासागर दिवस’ (जुन ८) सम्म विश्वभर सञ्चालन हुनेछ।
ASEZ ले नेपालमा यसअघि पनि पुलचोक क्याम्पस सरसफाई, हर्न निषेध अभियान र भूकम्पपछिको विद्यालय पुनर्निर्माण जस्ता सामाजिक कार्यहरू गर्दै आएको छ।
परमेश्वरको मण्डली विश्व सुसमाचार समाज, जसले विश्वका १७५ देशमा ७,८०० भन्दा बढी शाखा मार्फत सेवा पुर्याउँदै आएको छ, उसले आफ्ना सदस्यहरू मार्फत नेपालमा मात्रै हालसम्म १ हजार भन्दा बढी पटक स्वयंसेवा गतिविधि गरिसकेको छ। समाजसेवामा पुर्याएको योगदान स्वरूप यो संस्थाले बेलायती महारानी अवार्ड र अमेरिकी राष्ट्रपति अवार्ड जस्ता ५,८०० भन्दा बढी अन्तर्राष्ट्रिय सम्मानहरू प्राप्त गरिसकेको छ।
प्रतिक्रिया लेख्नुहोस्:-