पोखरा, कास्की — कास्की कारागारभित्र व्यापक वेथिति, भ्रष्टाचार तथा गैरकानुनी गतिविधि भइरहेको आरोप लगाउँदै एक युवाले जिल्ला प्रशासन कार्यालय कास्कीमा ज्ञापनपत्र बुझाएका छन् ।
साइबर अपराधसम्बन्धी मुद्दामा १० महिना कारागार बसेर निस्किएका रेशम राज पौडेलले १० बुँदे मागसहित प्रमुख जिल्ला अधिकारी रुद्रादेवी शर्मालाई ज्ञापनपत्र बुझाएका हुन् । उनले कारागार बसाइँका क्रममा आफूले देखेका तथा भोगेका समस्याबारे विस्तृत जानकारी गराउँदै तत्काल सुधारको माग गरेका छन् ।
ज्ञापनपत्रमा कारागारभित्र कैदीबन्दीमाथि हुने थिचोमिचो, असुली, उपचार अभाव तथा पहुँचका आधारमा हुने विभेद अत्यन्तै दयनीय रहेको उल्लेख गरिएको छ । “कारागार सुधारगृह हुनुपर्नेमा केही व्यक्तिका लागि आर्थिक लाभ लिने थलो बनेको छ,” पौडेलले बताएका छन् ।
उनले पहुँच नभएका कैदीबन्दीले भोग्ने दुःखकष्ट र कारागारभित्र सञ्चालन हुने कथित अवैध धन्दा तत्काल बन्द गर्न माग गरेका छन् । साथै, कैदी र थुनुवाबीचको भेदभाव, व्यक्तिअनुसार अतिरिक्त सुविधा, भेटघाटमा दोहोरो मापदण्ड, तथा सरकारी सुविधामा कमिसन लिइने विषयमा पनि प्रश्न उठाएका छन् ।
ज्ञापनपत्रमा कारागारभित्र एक बन्दीमाथि कुटपिट भएको घटनाबारे समेत छानबिन गर्न माग गरिएको छ । पौडेलले एक हप्ताभित्र माग सम्बोधन नभए आफू अनशन बस्न बाध्य हुने चेतावनी दिएका छन् । साथै, कास्की कारागारभित्रको आर्थिक अनियमितताको निष्पक्ष छानबिन गरी आवश्यक कदम चाल्न सरकारसँग आग्रह गरेका छन् ।
प्रतिक्रिया लेख्नुहोस्:-