पोखरा / तनहुँमा २ जनाको मृत्यु हुनेगरि भएको बस दुर्घटनामा मोटरसाइकलको गलत युर्टन र बसको तिव्र गति भएको देखिएको छ । शुक्रबार शुक्लागण्डकी नगरपालिका–७ शेराटारमा पोखराबाट नारायणगढतर्फ जाँदै गरेको ग २ ख १८३६ नम्बरको बस दुर्घटनामा परेको थियो । उक्त दुर्घटना बसले मोटरसाइकललाई जोगाउँदा भएको देखिएको छ ।
तिब्र गतिमा बस गइरहेको र बस भन्दा अघि रहेको एक मोटरसाइकलले अचानक युर्टन लिदाँ ठूलो दुर्घटना भएको जिल्ला ट्राफिक प्रहरी कार्यालय तनहुँका प्रमुख प्रविण थापाले जानकारी दिए । उनका अनुसार बसमा सवार २ जनको मृत्यु भएको हो भने अन्य घाइतको पोखराको मणिपाल अस्पताल र अन्नपूर्ण अस्पतालमा उपचार भएको छ । उनका अनुसार हाल बस चालक र सहचालकलाई प्रहरीको नियन्त्रणमा रहेका छन् ।
‘मोटरसाइकल र बस संगसंगै आइरहेका थिए । मोटरसाइकलले गलत युर्टन लिदाँ बसले ब्रेक हान्दा गाडी पल्टिएको देखियो ।गाडी अलि स्पिड नै देखियो’ उनले भने, ‘ठूलो गाडी भएकाले पल्टिएको हो । यसमा हाइड्रोलिग ब्रेक हुँदैन । रोडको कारण वा भिर भएर होइन मोटरसाइकलले गल्ति गर्दा गाडी पल्टिएको हो ।’ गाडीवालाले मोटरसाइकल जान्छ भनेर थाहा पाएरै जोगाउन खोज्दा दुर्घटना भएको हो ।
दुर्घटनामा परि तनहुँको म्याग्दे गाउँपालिका– १ बस्ने ६५ बर्षकी जसमाया सुनार र पाल्पाको निस्दी गाउँपालिका–७ का सिन्दुरेकी २४ बर्षीय घमिसरा रानाको मृत्यु भएको हो ।
बसमा ३५ जना सवार थिए । १७ जना घाइतेको पोखरास्थित मणिपाल शिक्षण अस्पताल र १२ जनाको अन्नपूर्ण बाल अस्पतालमा उपचार भैरहेको छ । ४ जना घाइते डिस्चार्ज भएका छन् । घाइते ६ जना गम्भिर,१६ जना मध्यम र ७ जनाको अवस्था सामान्य रहेको छ ।
बसमा सवार यात्रु देव गजमेरले दुई पांग्रे सवारीलाई जोगाउन खोज्दा दुर्घटना भएको सुनाए । आफुले पुर्नजन्म पाएको बताउँदै उनले बसपनि तिब्र गतिमा रहेको र अगाडी मोटरसाइकलले झुक्याएको कारण दुर्घटना भएको बताए । उनी दुलेगौडाबाट बस चढेका थिए ।
‘दुलेगौडाँबाट बस चढेको थिएँ । त्यसपछि अलि अघि सेरा भन्ने ठाउँमा आउँदा बाइक की स्कुटीमात्र देखे । गाडी अलिकति स्पिड ने थियो । ब्रेक लगायो कि के ग¥यो अचानक पल्टियो । त्यसपछि म उठ्दा मेरो छेउको एक जना आमा बेहोस हुनुहुन्थ्यो’ उनले भने, ‘म ठिक छु । गाठी गतिमै थियो तर, बाइक वा स्कुटरले झुक्यायो । म सामान्य छु मैले पुर्नजन्म पाए ।’
प्रतिक्रिया लेख्नुहोस्:-