पूर्वमन्त्री गुप्तालाई थुनामा राख्न विशेष अदालतको आदेश

काठमाडौं । विशेष अदालतले घुस लिएको आरोपमा भ्रष्टाचार मुद्दा खेपिरहेका पूर्वमन्त्री राजकुमार गुप्तालाई थुनामा राखेर मुद्दा अघि बढाउन आदेश दिएको छ ।
बुधबार विशेष अदालतमा उपस्थित भएका गुप्ताको बयानपछि थुनछेक बहस सम्पन्न भएको थियो । त्यसपछि अदालतले उनलाई थुनामै राख्नुपर्ने ठहर गरेको हो । विशेष अदालतले आफ्नो वेबसाइटमार्फत सार्वजनिक गरेको विवरणअनुसार गुप्तालाई पुर्पक्षका लागि थुनामा राख्ने आदेश भएको छ ।
विशेष अदालतका अध्यक्ष सुदर्शनदेव भट्ट तथा सदस्यहरू डिल्लीरत्न श्रेष्ठ र विदुर कोइरालाको इजलासले गुप्तालाई थुनामा पठाउने निर्णय गरेको हो । यद्यपि, आदेशको पूर्ण विवरण भने हालसम्म सार्वजनिक भइसकेको छैन ।
पूर्वमन्त्री गुप्ता घुस लिएको आरोपमा अख्तियार दुरुपयोग अनुसन्धान आयोगद्वारा मुद्दा दायर भएपछि अदालतमा उपस्थित भएका थिए । अब उनी थुनामै रहेर मुद्दाको प्रक्रिया अगाडि बढाइनेछ ।