पोखरा — नेपाल क्योकुशिन–कान कराते संघ कास्कीको आयोजनामा २५औँ राष्ट्रिय फुल कन्ट्याक्ट क्योकुशिन–कान कराते तथा ७औँ राष्ट्रिय क्योकुशिन–कान कराते प्रतियोगिता–२०८१ पोखरामा आयोजना हुने भएको छ।
प्रतियोगिता पौष ३० गते पोखरा रंगशालामा तथा माघ १ गते पोखरा–१५, टुटुङ्गामा सञ्चालन हुनेछ। प्रतियोगितामा देशभरका विभिन्न डोजो तथा शाखाबाट सहभागी खेलाडीहरूले प्रतिस्पर्धा गर्ने संघका अध्यक्ष लक्षुमण कुवरले जानकारी दिए ।
प्रतियोगिताको उद्देश्य कराते खेलको निरन्तरता, खेलाडीहरूको क्षमता अभिवृद्धि, राष्ट्रिय तथा अन्तर्राष्ट्रिय स्तरका खेलाडी उत्पादन, साथै स्थानीय कला, संस्कृति र पर्यटन प्रवर्द्धन गर्नु रहेको छ। प्रतियोगितामा पुरुष तथा महिला तर्फ विभिन्न तौल समूहमा फुल कन्ट्याक्ट कराते प्रतिस्पर्धा हुनेछ।
खेलसँगै सांस्कृतिक कार्यक्रम, कराते डेमोन्स्ट्रेसन तथा अन्य मनोरञ्जनात्मक प्रस्तुति समेत समावेश गरिने आयोजकले जनाएको छ। प्रतियोगितामा उत्कृष्ट प्रदर्शन गर्ने खेलाडीहरूलाई शिल्ड, मेडल, प्रमाणपत्र तथा नगद पुरस्कार प्रदान गरिनेछ। साथै उत्कृष्ट महिला र पुरुष खेलाडीलाई विशेष सम्मान गरिने व्यवस्था गरिएको छ।
प्रतियोगिता सफल बनाउन मुख्य प्रायोजक, सह–प्रायोजक, ब्यानर प्रायोजक तथा विभिन्न संघ–संस्थाको सहयोग अपेक्षा गरिएको आयोजक समितिका संयोजक लक्ष्मण कुँवरले जानकारी दिए। प्रतियोगिताको अनुमानित कुल बजेट करिब ११ लाख रुपैयाँभन्दा बढी रहेको छ।
नेपालमा क्योकुशिन–कान करातेको विकास, अनुशासन र आत्मरक्षाको चेतना फैलाउन यस्ता प्रतियोगिताले महत्वपूर्ण भूमिका खेल्ने आयोजकको विश्वास छ। प्रतियोगितामा दर्शकहरूका लागि निःशुल्क प्रवेशको व्यवस्था गरिएको छ।
प्रतिक्रिया लेख्नुहोस्:-