पोखरा / पोखरा महानगरपालिकाले मणिपाल शिक्षण अस्पताललाई उत्कृष्ट करदाताका रुपमा सम्मान गरेको छ ।
महानगरको ६७औँ स्थापना दिवसको अवसरमा उत्कृष्ट करदाता सम्मान मणिपाललाई दिएको हो । मणिपालले ३६ लाख १४ हजार १५ रुपैयाँ कर तिरेर सर्वाधिक कर तिर्ने व्यवसाय बनेको भन्दै सम्मान गरियो ।
तर मणिपालले महानगरलाई २० करोड रुपैयाँ कर अझै तिरेको छैन ।
नक्सापास बापतको करिब २० करोड तिर्न बाँकी छ । महानगरले यस अघि कानुन मिचेरै अस्पताललाई कर छुट दिने निर्णय गरेको थियो ।
गलत नियतका साथ राजस्व छुट दिइएको उजुरी परेपछि अख्तियारले महानगरमा छापा हानेर कागजात नियन्त्रणमा लिएको थियो ।
२०५३ मा बनेको मणिपाल अस्पताललाई महानगरको २०७९ चैत १० गते भएको बैठकले कर छुट दिने निर्णय गरेको थियो । बैठकले २० करोड कर छुट दिएर एक करोड ७५ लाख लिई मणिपाललाई भवन सम्पन्न प्रमाणपत्र दिने निर्णय लिएको थियो ।
उक्त निर्णयको आलोचना भएपछि १५ औँ नगरसभाले निर्णय नै बदर गर्ने निर्णय गरेको थियो । उक्त सभाले कर निर्धारण समिति गठन गरेकोमा समितिले कुनै पनि अध्ययन हालसम्म गरेको छैन ।
महानगरले तत्कालीन समयमा तिर्नुपर्ने नक्सापास बापतको रकम अहिले तिरिरहेको कर फरक भएकोले सम्मान गरिएको दाबी छ । राजस्व छुट गरेको विषय अहिले पनि अख्तियारमै विचाराधीन छ ।
दोस्रोमा पोखरा ग्राण्ड प्रालि बनेको छ । ग्राण्डले २१ लाख ८४ हजार १ सय ८६ रुपैयाँ तिरेको हो । मालपोत, सम्पत्ति र व्यवसाय कर तिरेर दोस्रो भएको महानगरले जनाएको छ । महेश बहादुर भट्टराईले ११ लाख १४ हजार १ सय ३६ रुपैयाँ मालपोत र सम्पत्ति कर तिरेर तेस्रो भएका छन् ।
सोही समारोहमा नियमित कर तिर्ने धिरज अर्याल, रामबाबु घिमिरे र राधा तिमिल्सिनालाई सम्मान गरिएको थियो ।
उनीहरुले मालपोत र सम्पत्ति कर समयमै तिरेका महानगरले जनाएको छ । धिरजले ४ हजार ७१, रामबाबुले १ हजार २ सय १४ रुपैयाँ र तिमिल्सिनाले १ हजार ४ सय ७४ रुपैयाँ कर तिरेका हुन् ।
प्रतिक्रिया लेख्नुहोस्:-