अर्जुन हिताङ् ।
बाँसको खम्बाबाट उज्यालोको बाटोतर्फ लम्किदै गरेको पैयुको नमुना गाउँ पर्वत जिल्ला पैयु गाउँपालिका वडा नं ४ बेसि_सृजनाटोलमा युवाहरुको अग्रगामी कदमले गाउँ नै पुर्णिमाको जुन जस्तो उज्यालो भएको छ।
सेतिखोलाको नजिकै पर्ने उक्त दलित बस्तिमा जुन किसिमको विकास गर्दै अगाडी बढ्दै छनन् युवाहरु सायद यो पालिका कै पहिलो उदाहरणीय काम हुन सक्छ।
राज्यको विशेष सहयोग नपाए पनि आफ्नै बलबुतामा समाजको परिवर्तनमा होमिएको पैयू रिभरसाइड युवा क्लब हाल गाउँको प्रेरणाको केन्द्र बन्दै गएको छ। स्थापना कालको एक वर्ष नपुग्दै क्लबले शैक्षिक, स्वास्थ्य, सरसफाइ, खेलकुददेखि विविध जनचेतनामूलक कार्यक्रमहरू निरन्तर सञ्चालन गर्दै समाजमा एक सशक्त उदाहरण पेश गरेको छ।
हालै मात्र दशैं तथा तिहारको अवसरमा क्लबले गाउँलाई उज्यालोमा रुपान्तरण गर्ने अभूतपूर्व काम गर्दै अँध्यारो सिङ्गो गाउँमा स्ट्रीट लाइट जडान गरेर सबैको मन जितेको छ। बाँसको खम्बामा आधारित भए पनि ती उज्याला बिजुलीहरूले गाउँमा उत्सव र सुरक्षा दुबैको अनुभूति दिलाएको छ। स्थानिय समाजसेवि टेक बहादुर विकका अनुसार यो हाम्रो लागि गौरवको विषय हो। आफ्नै बाबु नानीले गाउँ नै उज्यालो बनाउछन भनेर सोचेको पनि थिएन् भन्दै दंगित देखिन्थे ।
गाउँ प्रवेशद्वारमा स्वागत गेट, गाउँ वरपरका नदी, नाला, मठ–मन्दिर, अस्पताल र बाटोघाटो लगायत महत्त्वपूर्ण स्थानहरू समेटिएको गाउँको नक्सा निर्माण गरी सृजनाशील नेतृत्वको परिचय दिएको छ। क्लबले विगतमा पनि साना-ठुला कार्यक्रम तथा प्राथमिक उपचार तालिम,सरसफाइ अभियान, खेलकुद प्रतियोगिता, तथा सांस्कृतिक कार्यक्रम गर्दै आएको क्लबका अध्यक्ष ज्ञान बहादुर विश्वकर्माले गण्डकी प्रेस जानकारी दिए ।
यसको सबै पहल स्वयंम क्लब र स्थानियहरुको साथ र सहयोग साथै गाउँलेहरूको ऐक्यबद्धता मार्फत सम्भव भएको आमा समूहका सदस्य फुलमाया विकले जानकारी दिए ।
युवा क्लबको यो सक्रियता हेर्दा यस्तो लाग्छ– “यदि राज्यको साथ, सहयोग र हौसला पाएको भए आज क्लब बाँसको खम्बामा सिमित नहुने थियो।” अझै पनि संघीय, प्रादेशिक वा स्थानीय सरकारका निकायहरूले यस्ता क्लबहरूलाई पहिचान गरी प्रोत्साहन र स्रोत साधनको पहुँच दिलाउन सके युवा नेतृत्वले समाज परिवर्तन गर्न सक्ने स्पष्ट संकेत देखिन्छ।
क्लब अध्यक्षदेखि लिएर सम्पूर्ण सदस्यहरू आफ्नो मेहनत, समय र सामूहिक प्रयासमार्फत समाजमा नयाँ इतिहास कोर्न लागिपरेका छन्। अध्यक्ष ज्ञान बहादुरका भनाइ अनुसार, “हामीलाई राज्यबाट साथ मिले, अझै व्यापक सामाजिक काम गर्दै अगाडि बढ्ने अठोट छ।”
प्रतिक्रिया लेख्नुहोस्:-