काठमाडौं, साउन ८
देशभरका विभिन्न स्थानहरूबाट अवैध लागूऔषध सहित १५ जना व्यक्तिहरू पक्राउ परेका छन्। प्रहरीले लागूऔषध नियन्त्रण अभियान अन्तर्गत बुधबार देशका विभिन्न जिल्लाहरूमा छापा मारेर चरेश, गाँजा, खैरो हेरोइन, ब्राउनसुगर तथा नाइट्राजेपाम जस्ता लागूपदार्थ सहित उनीहरूलाई पक्राउ गरेको हो।
काठमाडौं — चन्द्रागिरी नगरपालिका-११ सतुङ्गलबाट करिब ६ किलोग्राम चरेश जस्तो देखिने पदार्थ सहित मकवानपुर थाहा नगरपालिका-२ की ३९ वर्षीया पार्वती मगरलाई प्रहरीले पक्राउ गरेको छ। बलम्बु प्रहरी प्रभागबाट खटिएको टोलीले उनलाई पक्राउ गरेको हो।
कैलाली — धनगढी उपमहानगरपालिका-१० का २० वर्षीय संजय रानालाई खैरो हेरोइन जस्तो देखिने १.७८ ग्राम लागूऔषध सहित पक्राउ गरिएको छ।
दाङ — तुलसीपुर उपमहानगरपालिका-१७ बाट ४५० मिलिग्राम ब्राउनसुगर सहित शंकर बस्नेत (२९ वर्ष) पक्राउ परेका छन्।
कञ्चनपुर — पुनर्वास नगरपालिका-११ डोकेबजारबाट १.३९ ग्राम खैरो हेरोइन सहित २० वर्षीय निशान्त ढकालसहित ३ जना तथा भिमदत्त नगरपालिका-९ ब्रह्मदेबबाट २० वर्षीय संजय लावड १०० मिलिग्राम खैरो हेरोइन सहित पक्राउ परेका छन्।
झापा — मेचीनगर नगरपालिका-६ पुरानो मेचीपुलबाट इलामका १८ वर्षीय एक किशोर ७.१३ ग्राम खैरो हेरोइन सहित पक्राउ परेका छन्।
उदयपुर — कटारी नगरपालिका-८ मा ४५ वर्षीया देवकुमारी थापा मगरको घरबाट प्रहरीले ३०.३६ किलोग्राम गाँजा फेला पारी पक्राउ गरेको छ।
सुनसरी — इनरुवा नगरपालिका-४ बसपार्कबाट २२ वर्षीय साजन श्रेष्ठ र २३ वर्षीय कृष्ण मगर ३.६ ग्राम ब्राउनसुगर सहित पक्राउ परेका छन्।
सिराहा — गोलबजार नगरपालिका-७ बस्ने ३० वर्षीय रबिन मुखिया ८०० मिलिग्राम खैरो हेरोइन सहित पक्राउ परेका छन्।
मकवानपुर — हेटौंडा-१५ रातोमाटेबाट ३९० मिलिग्राम खैरो हेरोइन सहित २२ वर्षीया अनुशा तामाङ पक्राउ परेकी छन्। उनी सवार वीरगञ्ज–नारायणगढ जाँदै गरेको बसबाट पक्राउ परेकी हुन्। अनुसन्धानका क्रममा बारा जीतपुरसिमरा-२१ का ३२ वर्षीय मनोज कुमार ठकुरीलाई समेत पक्राउ गरिएको छ।
बाँके — नेपालगञ्ज उपमहानगरपालिका-१ वाटरपार्कबाट २ सय ६४ ट्याब्लेट नाइट्राजेपाम सहित १८ वर्षीय एक किशोर पक्राउ परेका छन्।
प्रतिक्रिया लेख्नुहोस्:-