सवारी दुर्घटनामा तीन जनाको मृत्यु

काठमाडौं, ४ साउन
देशका विभिन्न स्थानहरूमा भएका तीन छुट्टाछुट्टै सवारी दुर्घटनामा तीन जनाको मृत्यु भएको छ भने तीन जना घाइते भएका छन्।
सुनसरी — इनरूवा नगरपालिका–७ बर्छुवा चोकमा को.३४ प ५१६ नम्बरको मोटरसाइकल शनिबार राति अनियन्त्रित भई दुर्घटनामा पर्दा चालक ३५ वर्षीय पारस यादवको मृत्यु भएको छ। बर्छुवा चोकबाट मुसहरी टोलतर्फ जाँदै गर्दा भएको दुर्घटनामा गम्भीर घाइते भएका यादवको जिल्ला अस्पताल इनरुवामा उपचारका क्रममा ज्यान गएको हो। सोही दुर्घटनामा मोटरसाइकलमा सवार एक जना घाइते भएका छन् र उनको उपचार जारी छ।
रूपन्देही — गैडहवा गाउँपालिका–८ स्थित सितलडाँडामा लु.६१ प ७२३८ नम्बरको मोटरसाइकलले ठक्कर दिँदा पैदल यात्री ६८ वर्षीया कुमारी कुँवरको मृत्यु भएको छ। अर्घाखाँची सन्धिखर्क नगरपालिका–१ की स्थायी बासिन्दा कुँवर शनिबार बेलुकीको दुर्घटनामा गम्भीर घाइते भएकी थिइन्। उपचारको क्रममा चौराहा अस्पताल, बुटवलमा गए राति उनको मृत्यु भएको हो। मोटरसाइकल चालक घाइते छन् र उपचाररत छन्।
दाङ — लमही नगरपालिका–५ सुनखोलीमा आइतबार बिहान पार्किङ गरी राखिएको लु.३ च ४८१४ नम्बरको बोलेरो पिकअपको पछाडिको टायरमा अड्याइएको ढुङ्गा निकाल्ने क्रममा गाडी ब्याक भई २१ वर्षीय राकेश कुमार बानियाँलाई किच्दा गम्भीर घाइते भए। आफ्नै घरअगाडि भएको घटनामा राकेशको लमही अस्पतालमा उपचारका क्रममा मृत्यु भएको प्रहरीले जनाएको छ।