पोखरा । रेवान पोखराका आयोजनामा फेवाताल किनारमा पुस दोस्रो साता सडक महोत्वस हुने भएको छ । रेष्टुरेन्ट एण्ड बार एसोसिएसन (रेवान) को आयोजनामा हुँदै आएको पोखरा सडक महोत्वसको २४ औं संस्करण आगामी पुसको १३ गतेदेखि संचालन हुने भएको हो ।
गण्डकी प्रदेशमै उत्कृष्ट महोत्सवको रुपमा रहेको महोत्सव पाँच दिनसम्म संचालन हुने बिहिबार आयोजित पत्रकार सम्मेलनमा रेवान अध्यक्ष नरेश भट्टराईले जानकारी दिए । महोत्सवको संयोजक समेत रहेका भट्टराईले महोत्सवको विशेषता भनेकै सडकमै खाने र रमाइलो गर्ने रहेको बताएका छन् । अंग्रेजी नयाँ वर्षको अवसर पारेर आयोजना हुँदै आएको महोत्सव विगतका वर्षहरुमा राजनैतिक अस्थिरता, भुकप्त, नाकाबन्दि, कोरोना महामारी लगायत थुप्रै आरोह अवरोहको सामाना गर्दै २४ औं संस्करणसम्म आइपुगेको बताए ।
उनले पर्यटकीय शहर पोखरामा हिँउदको समयमा होटल तथा रेस्टुरेन्ट बन्द हुने र अंग्रेजी नयाँ वर्षको समयमा नेपाल आएका विदेशीहरु पनि भारत, थाइल्याण्ड लगायत अन्य राष्ट्रमा गएपछि महोत्सवलाई अघि सारेको सुनाए । फेवा किनारमा ३ किलोमिटरको क्षेत्रमा महोत्वसको आयोजना हुने बताए । विगतका वर्षमा झैं यो वर्षसमेत सांस्कृतिक कार्यक्रम, मौलिक भेषभुषा, प्रदर्शनी, राष्ट्रिय तथा अन्तर्राष्ट्रिय खानाको प्रदर्शनी, दोहोरी गीत प्रतियोगिता, भाँकी प्रदर्शनी, कन्सर्ट, डु®ा दौड प्रतियोगिता, वेयर रेस, रस्सा कस्सी, भेट्रान्स टेनिस प्रतियोगिता तथा पोखराको प्रमुख गन्तव्य सहितको डकुमेन्ट्री प्रदर्शनी गरिने जानकारी दिए । पुस १७ गतेसम्म संचालन हुने महोत्वसबाट करिब ८५ लाख रुपैयाँ आम्दानी तथा ७० लाख खर्च हुने अनुमान गरिएको छ । महोत्सव फिस्टेल गेटदेखि खहरे चोक हुँदै जरेवर लेकसाइडसम्म हुनेछ ।
प्रतिक्रिया लेख्नुहोस्:-