पोखरा । नेपाल प्रगतिशील लोकतान्त्रिक पार्टीले देश लामो समयदेखि राजनीतिक जडतामा फसेको बताउँदै त्यसको विकल्पका रूपमा आफूहरू उभिएको दाबी गरेको छ । प्रतिनिधि सभाका समानुपातिक उम्मेदवार महेश गोदारले वर्तमान राजनीतिक अभ्यासले जनताको जीवनस्तरमा सकारात्मक परिवर्तन ल्याउन नसकेको बताए ।
गोदारका अनुसार सरकार फेरिए पनि नीति, कार्यशैली र सोचमा परिवर्तन नआउँदा विकास प्रक्रिया अवरुद्ध भएको छ । उनले नेपाल प्रगतिशील लोकतान्त्रिक पार्टी उन्नत विचार, जनउत्तरदायी शासन प्रणाली र व्यवहारिक लोकतन्त्रको पक्षमा रहेको स्पष्ट पारे । नयाँ पुस्ताको आकांक्षा र पुराना पुस्ताका पीडालाई एकसाथ सम्बोधन गर्न सक्ने राजनीतिक शक्ति आफ्नो पार्टी भएको उनको भनाइ थियो ।
अन्य कम्युनिष्ट पार्टीहरूप्रति टिप्पणी गर्दै गोदारले वैचारिक रूपमा मात्रै होइन, व्यवहारमा पनि कम्युनिष्ट मूल्य आत्मसात् गर्ने दल नेपाल प्रगतिशील लोकतान्त्रिक पार्टी भएको दाबी गरे । जनताको विश्वास जित्न र अपेक्षा पूरा गर्न आफू उम्मेदवार बनेको बताउँदै उनले आगामी निर्वाचनमा पार्टीको चुनाव चिन्ह ‘आँखा’ मा मतदान गर्न आग्रह गरे ।
यसै कार्यक्रममा नेपाल प्रगतिशील लोकतान्त्रिक पार्टीका केन्द्रीय सदस्य तथा प्रतिनिधि सभाका समानुपातिक उम्मेदवार दलसिंह खत्रीले संसदमार्फत जनताको आवाज सशक्त रूपमा उठाउने प्रतिबद्धता व्यक्त गरे । उनले सरकार र संसदमा जनताको समस्या र यथार्थ कुरा राख्न आफ्नो उम्मेदवारी केन्द्रित रहेको बताए ।
खत्रीका अनुसार नेपाल प्रगतिशील लोकतान्त्रिक पार्टीले जाति, धर्म, भाषा र संस्कृतिका आधारमा हुने विभेदको अन्त्य गर्दै सामाजिक न्याय र समानताको राजनीति अघि बढाउने लक्ष्य लिएको छ । उनले केही नयाँ राजनीतिक दलहरू स्पष्ट दृष्टिकोण र योजना बिना नै राजनीतिमा सक्रिय भएको टिप्पणी गर्दै, आफ्नो पार्टी भने समाजवाद उन्मुख ठोस नीतिसहित अघि बढिरहेको बताए ।
उनले पार्टी संसदमा पुगेपछि युवापुस्ताको भूमिका सशक्त बनाइने जानकारी दिए । विशेष गरी जेन्जी (Gen-Z) पुस्ताका शिक्षा, रोजगारी, प्रविधि र अवसरसँग जोडिएका मुद्दा प्राथमिकतामा राख्दै समाजवादतर्फको यात्रालाई तीव्र बनाइने खत्रीले बताए । यसै सन्दर्भमा जेन्जी आन्दोलनको नाममा हस्ताक्षर अभियान सञ्चालन गरिएको र त्यसले युवाको आवाज नीति निर्माण तहसम्म पुर्याउने विश्वास व्यक्त गरे ।
प्रतिक्रिया लेख्नुहोस्:-