पोखरा / गएको शुक्रवार प्रहरीले पोखरा महानगरपालिका वडा ४ स्थित छब्बिस कुरियामा सवारी चेकजाच गर्यो ।
वडा प्रहरी कार्यालय बैदामको टोलिले ग २० प ६७३९ नम्बरको स्कुटर रोकि चेकजाँच गर्यो । स्कुटरमा सवार जितेन गुरुङले बोकेको झोलामा लागू औषध स्टेगन २५ लेखिएको १९ ट्याब्लेट, नाइट्रोभ्याट ५१ ट्याब्लेट, डाईजापाम ३ एम्पुल, ब्रुफिनुर्फिन ३ एम्पुल र फेनेरागन ३ एम्पुल र नगद १४ हजार ७ सय रुपैयाँ बरामद गर्यो ।
प्रहरीले तत्काल उनको पहिचान खोज्दा उनी स्याङ्जा भिरकोट नगरपालिका वडा नं. ३ का २६ वर्षीय जितेन गुरुङ रहेको खुल्यो ।
प्रहरीले थप अनुसन्धान अघि बढायो । अनुसन्धानको क्रममा उनी पोखरा ९ नागढुंगास्थित पर्वत स्याङ्जा दिपक होटलमा बसेका भेटियो । उक्त होटलमा जितेन बसेको कोठामा आइतबार खानतलासी गर्दा प्रहरीले डाईजापाम ९९ एम्पुल, फेनेरागन ९८ एम्पुल र ब्रुफिनुर्फिन ९७ एम्पुल गरी जम्मा २९४ एम्पुल लागू औषध समेत बरामद गर्यो ।
जितेन विरुद्ध लागुऔषध सम्बन्धि मुद्दा दर्ता गरि थप अनुसन्धान भइरहेको प्रहरीले बताएको छ ।
प्रतिक्रिया लेख्नुहोस्:-