पाेखरा । देशका विभिन्न स्थानमा शनिबार र आइतबार भएका छुट्टाछुट्टै सवारी दुर्घटनामा पाँच जनाको ज्यान गएको छ। सबै घटनामा चालकहरू प्रहरी नियन्त्रणमा रहेका छन्।
सिराहा– नरहा गाउँपालिका-३ खोरीया चौहर्वास्थित सडकमा ज.१० प ४०३ नम्बरको मोटरसाइकलले ठक्कर दिएपछि पैदलयात्री धनेशरी देवी सदाको (४६) मृत्यु भएको छ। गम्भीर घाइते भएकी उनको उपचारका क्रममा प्रादेशिक अस्पताल सिराहामा निधन भएको प्रहरीले जनाएको छ। मोटरसाइकल चालकलाई नियन्त्रणमा लिई अनुसन्धान भइरहेको छ।
डडेल्धुरा– आलिताल गाउँपालिका-८ गोदाम बजारमा भे.१ त ७८५४ नम्बरको ट्याक्टर अनियन्त्रित भई दुर्घटना हुँदा ट्याक्टरमा सवार भरत रावत (२७) को ज्यान गएको छ। घाइते अन्य २ जनाको जोगबुढा अस्पतालमा उपचार भइरहेको छ भने एक जनालाई थप उपचारका लागि धनगढी रिफर गरिएको छ। चालक प्रहरी नियन्त्रणमा छन्।
मोरङ– सुन्दरहरैंचा नगरपालिका-४ गछिया खोलास्थित सडकमा प्रदेश १-०२-००५ ह ११६१ नम्बरको सिटीले को.२० प ५९४८ नम्बरको मोटरसाइकललाई ठक्कर दिँदा चालक छत्र बहादुर थापा (२६) को मृत्यु भएको छ। गम्भीर घाइते थापाको गोल्डेन अस्पताल विराटनगरमा उपचारको क्रममा मृत्यु भएको प्रहरीले जनाएको छ। सिटी चालक नियन्त्रणमा रहेका छन्।
मकवानपुर– भिमफेदी गाउँपालिका-१ बुङदलमा आइतबार बिहान बा.प्र.०३–००५ प ७९८० नम्बरको मोटरसाइकल अनियन्त्रित भई दुर्घटना हुँदा हेटौंडा-२ चौकीटोलका बिर बहादुर गुरूङ (३९) र नवलपरासी पूर्व, कावासोती-१३ का चन्द्र बहादुर गुरूङ (३५) को घटनास्थलमै मृत्यु भएको छ।
प्रतिक्रिया लेख्नुहोस्:-