सवारी दुर्घटनामा तीन जनाको मृत्यु

असार — देशका तीन जिल्लामा बिहीबार र शुक्रबार भएका छुट्टाछुट्टै सवारी दुर्घटनामा तीन जनाको मृत्यु भएको छ। तीमध्ये दुई जना पैदलयात्री र एक जना मोटरसाइकल चालक रहेका छन्।

नुवाकोट — बेलकोटगढी गाउँपालिका–७, कल्चेडीभिरस्थित सडकमा ना.६ ख १०६० नम्बरको ट्रकले बा.प्र.०२-०२९ प १६४२ नम्बरको मोटरसाइकललाई ठक्कर दिँदा मोटरसाइकल चालक तारकेश्वर गाउँपालिका–३ बस्ने ४५ वर्षीय शंकर मान श्रेष्ठ गम्भीर घाइते भए। उनलाई तत्काल काठमाडौंस्थित बीएण्डबी अस्पतालमा भर्ना गरिएको थियो। उपचारकै क्रममा श्रेष्ठको मृत्यु भएको प्रहरीले जनाएको छ। ट्रक चालकलाई नियन्त्रणमा लिइएको छ।

बारा — निजगढ नगरपालिका–९ स्थित सडकमा सिराहाबाट काठमाडौँतर्फ जाँदै गरेको बा.प्र.०३-०१ ख ३३१३ नम्बरको बसले पैदल हिँडिरहेका ७८ वर्षीय सन्त बहादुर गुरुङलाई ठक्कर दिएको थियो। जीतपुरसिमरा उपमहानगरपालिका–१६ पिलुवा निवासी गुरुङ गम्भीर घाइते भएपछि उपचारका लागि प्रादेशिक अस्पताल कलैया लगिएको थियो। तर, राति नै उपचारको क्रममा मृत्यु भएको जिल्ला प्रहरी कार्यालय बाराले जनाएको छ। बस चालकलाई पनि प्रहरीले नियन्त्रणमा लिएको छ।

बर्दिया — बढैयाताल गाउँपालिका–८, तिलकानास्थित सडकमा कण्ठपुरबाट पचासा तर्फ गइरहेको भे.१२ प ४९२ नम्बरको मोटरसाइकलले पैदलयात्री ५८ वर्षीया दिलमाया आचार्यलाई ठक्कर दिएको थियो। गम्भीर घाइते भएकी आचार्यको नेपालगञ्जस्थित न्युरो अस्पतालमा शुक्रबार बिहान उपचारका क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।

तीनवटै घटनाको थप अनुसन्धान जारी रहेको प्रहरीको भनाइ छ।