पोखरा । २०५५ सालमा पोखराको पृथ्वीचोक र बुद्धचोकको बीचमा रहेको सेती नदीमाथि पुल बन्यो । जनवादी गणतन्त्र चीन सरकारको सहयोगमा सेती नदी पुल बन्यो । तिन स्पान संख्या भएको एक सय ८० मिटर लम्बाईको दुई लेनको पुल निमार्ण भयो ।
पुल ०५५ कार्तिक २६ गते तत्कालिन प्रधानमन्त्री स्व. गिरिजाप्रसाद कोइरालाले उद्घाटन गरेसंगै संचालनमा आएको थियो । २४ वर्ष अघि बनेको पुल अहिले निकै साघुँरो बनेको छ । पोखरामा सवारी चापको वृद्धि भएसंगै पुल सानो भएको हो । पृथ्वीराजमार्ग अन्तरगत पर्ने उक्त पुल पोखराको मुख्य बसपार्कसंग जोडिएको पुल हो । पुल साघुँरो भएकै कारण दैनिक जसो दुर्घटना समेत हुने गरेको छ ।
दुई तर्फ फराकिलो सडक बनेपनि पुल भने अझै साघुँरो छ । चाइनापुलले परिचित उक्त स्थानमा नयाँ डिजाइनका दुई वटा पक्की पुल निर्माण हुने भएको छ । पोखराको सेतीनदी माथि रसुवा कन्स्ट्रक्सन कम्पनीले पुल निर्माणको जिम्मा पाएसंगै निर्माण प्रकृया सुरु गरिएको छ ।
कम्पनीका प्रतिनिधि सुदर्शन देवकोटाका अनुसार नेपालमा बनेका पुलहरु मध्ये नितान्त फरक प्रकृतिको पुल निर्माण हुने भएको छ । निर्माण हुने पुलको बिचको स्पाम १ सय ४० मिटर, फुटपाथको क्षेत्र २५/२५ मिटरको स्पाम क्षेत्रफल राखि १ सय ९० मिटरको पुल निर्माण हुने भएको देवकोटाले जानकारी दिए ।
हाल पोखरा रंगशालाको दक्षिण उत्तर तर्फको क्षेत्रमा अस्थायी क्याम्प निर्माण गर्न सुरु गरिएको छ भने निर्माण सामाग्रि फेब्रिकेसन र कंक्रिटका सामानहरु ल्याउन थालिएको छ । हाइ स्टे«ेन्थको कंक्रिट पुल निर्माण हुने भएकोले केही समय पछि पुल निर्माण स्थलमा रेडिमिक्सचर राखिने भएको छ ।
हाल संचालनमा रहेको चाइना पुलको उत्तर र दक्षिण साइडमा दुई वटा पुल चाइना पुलकै लेवलमा निर्माण हुनेछ । गाडी गुड्ने भाग साँढे ७ मिटर फुटपाथको रुपमा भने दुबै पुलको ३/३ मिटरको क्षेत्र रहने उनको भनाइ छ । साँढे १० मिटरको पक्कि पुल निर्माण हुने भए पनि केही भाग टावर सहित गर्दा १३ मिटरको पुल निर्माण हुने उनले बताए ।
चीनियाँ कम्पनीले निर्माण गरेको हाल संचालित पुल ९० मिटर बिचमा राखिएको छ भने सेतीको भाग जोखिम होला भनेर अब बन्ने पुलमा आफुहरुले १ सय ४० मिटरको जग राख्ने उनले बताए । पुलको डिजाइन र नक्सा समेत निमार्ण कम्पनीलेनै बनाउने भएको पुल उत्कृष्ट हुनेमा आशावादी रहेको उनले बताए ।
उक्त परियोजना सेप्टेम्बर २०२२ मा सम्झौता भएको थियो । ३६ महिनामा निमार्ण गर्नेगरी सम्झौता भएको थियो । पुलको डिजाइनको समयनै ६ महिना रहेको उनले बताए । समय सिमा भित्र उक्त पुल निर्माण गर्ने कम्पनीले दाबी गरेको छ । कम्पनीले पुल निर्माण गर्न नक्सा स्विकृतका हाल पेश गरिसकेको छ । पोखराको सेतीनदीमा ९४ करोडको लागतमा दुई वटा पुल निर्माण भएसंगै चाइना पुल सहित ३ वटा पुलमा आवाज जावात गर्न सकिने भएको छ । उक्त पुल पोखराको लागि नौलो र सेल्फि बृजको रुपमा निर्माण हुने भएको कम्पनीले जनाएको छ ।
यसैबिच पोखरामा अन्तराष्ट्रिय विमानस्थल निर्माण भएसंगै उक्त पुल जतिसक्दो छिटो निर्माण गर्न पोखरा महानगरले आवश्यक समन्वय गर्न तयार रहेको महानगरका मेयर धनराज आचार्यले बताउदै आएका छन् । उता ट्राफिक प्रहरीले पनि हाल संचालनमा रहेको पुल निकै साघुँरो भएकाले दुर्घटना र सवारी जाम हुने गरेको बताउँदै आएको छ । ट्राफिक प्रहरीले पनि उक्त स्थानमा अब नयाँ पुल बन्न आवश्यक रहेको बताउँदै आएका थिए ।
माघ २६ गते सोही पुल नजिकै स्कुटर अनियन्त्रित भई पल्टदा स्कुटर चालकको मृत्यु भएको थियो । पृथ्वीचोक स्थित चाइना पुल नजिकै पृथ्वीराजमार्ग अन्तरगतको सडकको ढलान बाटो र पिचबाटो बीचमा रहेको उचाइमा अनियन्त्रित भई पल्टदा बसले कुल्चेर स्कुटर चालक महिलाको मृत्यु भएको थियो ।
घटनापश्चात जिल्ला ट्राफिक प्रहरी कार्यालय कास्कीका सूचना अधिकारी शिव प्रसाद पाठकले पृथ्वीचोकदेखी चाइनापुलसम्मको बाटो ६ लेनभन्दा ठूलो भएको र पुल दुई लेनको भएको कारणले समेत दुर्घटनाको जोखिम बढिरहेको बताएका थिए ।
प्रतिक्रिया लेख्नुहोस्:-