पोखरा । लेकसाइडस्थित बाराही चोकमा रहेको VNY (Visit Nepal Year) पार्कको बाराही टोल विकास संस्थाले विशेष सरसफाई कार्यक्रम सम्पन्न गरेको छ।
पार्कको पुनर्निर्माणपछि पोखराको पर्यटन व्यवस्थापनमा थप सहजता आउने विश्वास व्यक्त गर्दै सामाजिक विकास तथा भौतिक निर्माण मन्त्री बिन्दुकुमार थापाले केन्द्रवर्ती यस पार्कको संरक्षण तथा व्यवस्थापनमा सरकारको पूर्ण सहयोग रहने प्रतिबद्धता जनाए ।
पार्कको पुनर्निर्माण तथा सौन्दर्यकरणका लागि प्रदेश सरकारसँग बजेटमार्ग र मास्टर प्लान नक्सा समेत तयार भइसकेको जानकारी पूर्व जनप्रतिनिधि एवं अभियन्ता हरि पहाडीले दिए । उनका अनुसार पुनर्निर्माणपछि पार्कमा सूचना केन्द्र, सार्वजनिक शौचालय, खानेपानी, पर्यटक र पैदल यात्रुका लागि छाहारिको व्यवस्था समेत हुनेछ।
संस्थाका अध्यक्ष गोमा पंगेनीको अध्यक्षतामा सम्पन्न कार्यक्रममा संस्थाका सदस्यहरू, स्थानीय नागरिक, पूर्व जनप्रतिनिधिहरू र पर्यटन व्यवसायीहरूको उल्लेखनीय सहभागिता रहेको थियो।
कार्यक्रमको सहजीकरण संस्थाका सचिव कृष्ण क्षेत्री उदयु ले गरेका थिए ।
उक्त अवसरमा बोल्दै सचिव क्षेत्रीले अहिले पार्क पुनर्निर्माणको काम अगाडि नबढेसम्म पर्यटकहरूलाई सहज बनाउने उद्देश्यले पार्क सरसफाई गरिएको जानकारी दिए । फेवाताल क्षेत्रलाई पर्यटनको केन्द्रबिन्दु बनाउँदै राख्न र पर्यावरणीय सौन्दर्य जोगाउन यो पहल गरिएको बताइएको छ।
कार्यक्रममा सहभागी पर्यटन व्यवसायी दोर्जे लामाले फेवाताल क्षेत्र पोखराको पर्यटकीय हृदयभूमि भएकाले पार्क क्षेत्रलाई सफा राख्नु सबैको साझा दायित्व भएको बताए । त्यस अवसरमा स्थानीय बुद्धिजीवी कृष्णप्रसाद पहाडी, सन् २०४६ सालको पार्क निर्माण अभियानका तत्कालीन सचिव तोपबहादुर अधिकारीको उपस्थिति रहेको थियो।
केही समय अघि नगरपालिकाले VNY पार्क क्षेत्रको भूभाग निजी क्षेत्रलाई शौचालय र कफी घर निर्माणका लागि दीर्घकालीन भाडामा दिने निर्णय गरेपछि विवाद उत्पन्न भएको थियो। यसविरुद्ध स्थानीय युवा समूहले VNY पार्क भाडामा दिनु हुँदैनु भन्दै अदालतमा मुद्दा दायर गरेका थिए। राजेन्द्र अधिकारीसहित पाँच जना स्थानीय युवाले गरेको मुद्दामा अदालतले पार्क संरक्षकहरूको पक्षमा फैसला गरेपछि मात्र पुनर्निर्माण प्रक्रिया अघि बढेको हो।
प्रतिक्रिया लेख्नुहोस्:-