विद्यार्थीहरूको सीप विकासका लागि आकार एसोसियसनद्वारा तालिम कार्यक्रम सुरु

पोखरा । आकार एसोसियसनको समन्वयमा विद्यार्थीहरूका लागि विभिन्न शीर्षकमा आधारित व्यावसायिक तालिमहरू सुरु भएका छन्। तालिमहरू ५ देखि ६ हप्तासम्म सञ्चालन हुने आकार एसोसियसनका प्रतिनिधि सन्दिप पौडेलले जानकारी दिए ।

तालिमका लागि सय जना भन्दा बढी विद्यार्थीले फारम भरेका थिए। वडा नम्बर २६ कार्यालय, आकार एसोसियसन र ८५ जना भन्दा बढी विद्यार्थीहरूको सहभागितामा उद्घाटन समारोह सम्पन्न भयो ।

कार्यक्रममा नेपालकै शैक्षिक धरोहर मानिने गण्डकी स्कुलका पूर्व प्राचार्य रवि प्रसाद बरालले”3 months after SEE” विषयमा करियर काउन्सिलिङ्ग र दिशा निर्देशनसहित शैक्षिक प्रस्तुति दिए । पोखरा २६ का वडा सचिवले कार्यक्रममा शुभकामना व्यक्त गर्दै विद्यार्थीलाई तालिमबाट अधिकतम लाभ लिन आह्वान गरे ।

पोखरा २६ का वडाध्यक्ष तथा युवा नेता नरेन्द्र थापाले “Learn and Earn” अवधारणा अन्तर्गत यस्तो तालिमले विद्यार्थीहरूलाई आत्मनिर्भर बनाउन सहयोग पुग्ने र आगामी दिनमा अझ बढी ज्ञान तथा सीपमूलक कार्यक्रम ल्याइने प्रतिबद्धता व्यक्त गरे ।

अनौपचारिक कार्यक्रम आकार एसोसियसनका ई.सन्दिप पौडेलले सञ्चालन गर्नुभएको थियो। तालिमका प्रशिक्षकहरूमा भिडियो एडिटिङ्ग तथा कन्टेन्ट क्रियसनतर्फ ई.अनुप न्यौपाने र सुशान्त, ग्राफिक्स डिजाइनतर्फ विवेक पौडेल, रोबोटिक्स तथा प्रोग्रामिङ्गतर्फ ई। अभिषेक शुक्ला, र Personality Development तथा Public Speaking का लागि ई. कुशल गौतम रहेका थिए ।

कार्यक्रमले विद्यार्थीहरूलाई प्रविधिमैत्री सीप प्रदान गर्दै आत्मनिर्भर, प्रतिस्पर्धात्मक र भविष्यमा सक्षम बन्ने दिशामा महत्वपूर्ण भूमिका खेल्ने अपेक्षा गरिएको छ। यस्ता अभ्यासमुखी तालिमहरू निरन्तर सञ्चालन हुँदै गएकाले समाजमै सकारात्मक परिवर्तन ल्याउने विश्वास व्यक्त गरिएको छ। सभाध्यक्षको भूमिका वडा जनप्रतिनिधि तीर्थबहादुर राजभण्डारीले निर्वाह गरेका थिए । औपचारिक कार्यक्रम वडा २६ का सूचना अधिकारी नवराज सापकोटाले सञ्चालन गरेका थिए ।