काठमाडौं– प्रमुख प्रतिपक्षी नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पूर्वराजा ज्ञानेन्द्र शाहलाई लक्षित पछिल्लो अभिव्यक्ति पुरानै तथ्य र प्रमाणका आधारमा दिइएको बताएका छन् ।
समाजवादी मोर्चा, नेपालले चैत १५ गते गर्न लागेको बृहत् विरोध सभाका बारेमा जानकारी दिन शनिबार आयोजना गरिएको पत्रकार सम्मेलनमा उनले शुक्रबार आफूले दिएको अभिव्यक्ति पुरानै तथ्य र प्रमाणका आधारमा दिइएको बताएका हुन् ।
‘मैले हिजो जे बोलेको छु, त्यो धेरै पहिलेदेखि बोलिराखेको कुरा हो । दरबार हत्याकाण्ड भएलगत्तै पछि, जतिबेला हामी भूमिगत थियौँ त्यतिबेला पनि यही कुरा बोलिएको थियो,’ प्रचण्डले भने, ‘म पहिलोचोटि गणतन्त्र नेपालको प्रधानमन्त्री भएपछि पनि त्यही कुरा बोलिएको थियो । मैले छानबिन आयोग बनाउन जरुरी छ भनेर त्यतिबेलै भनेको थिएँ ।’
पछिल्लो समय राजावादीले पूर्वराजा ज्ञानेन्द्रलाई फेरि तेस्रोपल्ट राजा बनाउने भन्दै आन्दोलन गर्न थालेपछी स्मरण गर्न आवश्यक ठानेर आफूले सिन्धुपाल्चोकमा उक्त अभिव्यक्ति दिएको उनको भनाइ थियो ।
‘तिनै कुरालाई अहिले जसरी फेरि पुनरुत्थानको कोसिस भएको छ, त्यस सन्दर्भमा स्मरण गर्नु आवश्यक ठानेर बोलेको हुँ । अझ मैले भनेको छु जनतालाई लागेको छ भन्ने भाषा छ मेरो त्यहाँ,’ प्रचण्डले भने, ‘जनताका यी प्रश्न छन्, त्यसको उत्तर खोज्नै पर्छ भन्ने हिसाबले भनेको हो । नयाँ तथ्य या नयाँ प्रमाण भनेर होइन । पुरानै तथ्य, पुरानै प्रमाण र आम नेपाली जनताको मनमा जे छ त्यो कुरा मैले मुखरित गरेको मात्रै हो ।’
सिन्धुपाल्चोकको मेलम्चीमा शुक्रबार माओवादी केन्द्रले आयोजना गरेको एक समारोह सम्बोधनका क्रममा प्रचण्डले पूर्वराजा ज्ञानेन्द्रलाई मूर्ति चोर र वंश मास्ने ‘भाइमारा’ को संज्ञा दिएका थिए ।
‘धेरै चुरीफुरी नगरे हुन्छ । धेरै मुर्खता पहिला पनि भइसकेको छ । अर्को मुर्खता गरे भने नेपाली जनता, नेपालका राजनीतिक दल उदार हुँदैनन् । त्यति भयानक दरबार हत्याकाण्ड गर्ने मान्छेहरू त उनको परिवारभित्र थिए नि १ सबै बुझेका छन् नेपाली जनताले । त्यसको प्लानर को हुन् भन्ने नेपाली जनतालाई थाहा छ,’ अध्यक्ष प्रचण्डको भनाइ थियो ।
प्रतिक्रिया लेख्नुहोस्:-