नेकपा माओवादी केन्द्रको विधान अधिवेशनमा अध्यक्ष पुष्पकमल दाहाल प्रचण्डले पार्टीका कमिटी प्रत्यक्ष निर्वाचनबाट गर्ने प्रस्ताव पेश गरेका छन् ।
काठमाडौंको कमलादीमा मंगलवारबाट शुरू भएको विधान अधिवेशनमा अध्यक्ष प्रचण्डले मस्यौदा पेश गर्दै पार्टीका कमिटीहरू प्रत्यक्ष निर्वाचनबाट गर्न प्रस्ताव गरेका हुन् ।
स्थानीय तहदेखि केन्द्रीय कमिटीसम्मको पार्टीका संरचनामा चुनाव हुनुपर्ने माग भएकोले यस विषयलाई हलले नै टुंग्याउने उनले बताएका हुन् ।
‘पार्टीमा भएको छलफल, माग र अनुभवले पनि पार्टीका स्थानीय तहदेखि केन्द्रीय कमिटीसम्मका संरचना निर्वाचित गर्नुपर्ने हुन्छ’ उनले भने, ‘प्रत्यक्ष भन्दै गर्दा समावेशीता पनि हेर्नुपर्ने हुन्छ । समावेशी प्रतिनिधित्वको लागि कति प्रतिशत राख्ने भन्ने विषयलाई हलले नै टुंग्याओस् ।’
प्रचण्डले प्रस्ताव पेश गरेपछि छलफलका लागि २० वटा समूह गठन गरिएको छ । अधिवेशनमा एक हजार दुई सय हाराहारी प्रतिनिधि सहभागी छन् ।
प्रत्यक्ष निर्वाचित मात्रै होइन पार्टीका संरचनामा अवधि, उमेर, युवालाई अवसरसहितका विषय पनि उठेका छन् । माओवादीमा केन्द्रीय कमिटी १५१ सदस्यीय र अरू संरचना पनि छरितो बनाउन माग भएको छ ।
प्रतिक्रिया लेख्नुहोस्:-