पोखरा । पोखरामा विद्यालय नाटक महोत्सव हुने भएको छ । पोखरा थिएटरको आयोजनामा हुने नाटक महोत्सव यहीं भाद्र २७ देखि सुरु हुनेछ । आगामी असोज १२ गतेसम्म चल्ने महोत्सवको लोगो आइतबार सार्वजनिक गरिएको छ ।
पाँचौँ संस्करणको विद्यालय नाटक महोत्सवमा कुल १५ वटा नाटक मञ्चन हुनेछन् । जस अन्तर्गत पोखरा महानगरपालिका भित्रका विद्यालयका १४ नाटक रहनेछन् । यसका अलावा अतिथि नाटकको रूपमा काठमाण्डौंबाट थप एक नाटक मञ्चन हुने पोखरा थिएटरका अध्यक्ष एवं महोत्सव संयोजक परिवर्तनले जनाए । यी नाटकहरू गन्धर्व नाटक घरमा महोत्सव अवधिभर हरेक दिन एक–एक वटाका दरले मञ्चन गरिनेछ ।
त्यसो त पोखरा थिएटरले २०७६ मा पोखरा महानगरपालिका स्तरीय विद्यालय नाटक महोत्सव गरेको थियो । त्यसपछि गण्डकी प्रदेशस्तरीय विद्यालय नाटक महोत्सव आयोजना ग¥यो । लगातार तीन वर्षसम्म प्रदेश स्तरीय विद्यालय नाटक महोत्सव आयोजना गरेको थिएटरले यस पटक पोखरा विद्यालय नाटक महोत्सव आयोजना गर्न लागेको हो ।
थिएटरमा भइरहेका गतिविधिका कारण पछिल्लो समयमा थिएटर प्रति विद्यार्थीको आकर्षण समेत बढ्न थालेको अध्यक्ष परिवर्तनले बताए । महोत्सवको नारा ‘विद्यालयमा रङ्गमञ्च,अर्थपूर्ण बाल सहभागिताको आधार’ रहेको छ ।
प्रतिक्रिया लेख्नुहोस्:-