काठमाडौँ । अनुशासनमा कसरी बस्ने भनेर आर्मीसँग सिक्नुपर्छ । तर, यहाँ उल्टो भइदियो । नेपाली सेनाको त्रिभुवन आर्मी क्लबका खेलाडी धनबहादुर भट्टले सातौं प्रधानमन्त्री कप एनभीए राष्ट्रिय भलिबल क्लब लिगमा दर्शकलाई मुक्का हाने । उनी नेपाली सेनाका जागिरे मात्रै होइनन्, आठ वर्षयता राष्ट्रिय टिमका ओपन स्पाइकर पनि हुन् ।
राष्ट्रिय टिमका सम्भावित कप्तानका रूपमा हेरिएका खेलाडीले दर्शकलाई प्यारापिटमै उक्लिएर मुक्का हानेको भिडियो सामाजिक सन्जालमा आएको छ, खेलवृत्तमै बहसको विषय बनेको छ । कभर्डहलमा गत सोमबार गण्डकीविरुद्ध ३–० को जित हात पारेको थियो । त्यसको तेस्रो सेटमा आर्मी २३–२४ को स्थितिमा चेकआउट हुँदा आर्मीलाई अंक दिएको भन्दै गण्डकीका खेलाडीहरू अम्पायरसँग गुनासो गर्न पुगेका थिए ।
दर्शकले पनि आर्मीविरुद्ध आक्रोश पोख्न थाले । आर्मी टिम भएको कोर्टतिर पानीको बोतल हाने । आर्मीका खेलाडीहरू भीआईपी प्यारापिट नजिकै रहेका गण्डकीका समर्थकतिर खनिए । औंला तेर्स्याउँदै गालीगलौज गर्दै झम्टिन थाले । धनबहादुरले बार नाघ्दै प्यारापिटको माथिल्लो क्षेत्रमा पुगेर दर्शकलाई मुक्का हानेर ढालिदिए ।
सेनाका खेलाडीको मुक्का खाएका रामजीप्रसाद डीसी भलिबलका ठूला प्रतियोगिताका नियमित दर्शक हुन् । ‘म आर्मीको फ्यान हुँ, त्यो दिन भने गण्डकी मन परेको थियो,’ माडी गाउँपालिका–४, रोल्पाका ३३ वर्षीय रामजीले भने, ‘मैले गाली गरेको छैन, बोतल हानेको छैन । त्यत्तिकै आएर मुक्का हानिहाल्नुभयो । खै किन मलाई कुटे थाहा भएन । सेतो हाफपाइन्ट, नीलो क्याप लगाएका आर्मीका मान्छेले मेरो फोटो खिच्दै जाने बेला तलाईं पख् भन्दै धम्क्याए । त्यसपछि सुरक्षाका लागि म प्रहरी कार्यालयमा निवेदन दिन गएँ । संघले खेलाएको खेल हो, उसैले कारबाही गर्छ भन्दै प्रहरीले निवेदन लिन मानेन । संघले निवेदन दियो भनेमात्रै प्रहरीले हेर्ने भन्यो । अनि मैले संघमा निवेदन दिएँ ।’
उक्त घटनालाई लिएर गण्डकीले पनि संघमा निवेदन दियो । त्यसपछि संघले महासचिव रोशन श्रेष्ठको संयोजकत्वमा सचिव सुनकेशरी माली, कोषाध्यक्ष श्यामकृष्ण श्रेष्ठ, सदस्यद्वय अञ्जु श्रेष्ठ र जुनु पुन रहेको पाँच सदस्यीय छानबिन समिति गठन गर्यो । समितिले घटनासँग सम्बन्धित व्यक्तिहरूसँग बयान लिइरह्यो, प्रतियोगिता चलिरह्यो । धनबहादुरसहित आर्मीका खेलाडीहरू खेलिरहे । पहिला आर्मीलाई समर्थन गरिरहेका दर्शक पनि आर्मीको विरोधी बने । ‘दर्शक कुट्ने टिम बाईबाई’ को नारा नै लगाए । आर्मीको प्रदर्शन पनि खस्कियो । डिफेन्डिङ च्याम्पियनका रूपमा प्रतियोगितामा खेलेको आर्मी तेस्रो स्थानमा खुम्चियो । समितिको प्रतिवेदनलाई सदर गर्दै संघको कार्यसम्पादन समितिले घटनाको ६ दिनपछि दोषीलाई कारबाही गर्ने निर्णय गर्यो, जुन प्रतियोगिता सम्पन्न भएपछि सुनाइयो ।
प्रतिक्रिया लेख्नुहोस्:-