पोखरा । कृषि अनुसन्धान निर्देशनालय लुम्लेको गाडी दुरुपयोग गरेको भन्दै अखिल क्रान्तिकारी विद्यार्थी संगठनले नियन्त्रण लिएका छन् । उक्त गाडी प्रयाेग गरी कर्मचारी विवाहाकाे भाेज खान गएकाे पाइएकाे छ ।
निर्देशनालयका निर्देशक डा.कालिका प्रसाद उपाध्यायले गण्डकी वि.ए.वि. ७४३८ नम्बरको स्कोरपियो विवाहमा प्रयोग गरेपछि विद्यार्थी संगठनले चाबी थुतेर प्रहरीलाई बुझाए ।
निर्देशक उपाध्यायले लुम्लेदेखी पोखरा २५ हेम्जामा एक विवाहमा उक्त गाडी लिएर आएका थिए । उनीसंगै कर्मचारी स्याप्रसाद पौडेल समेत विवाहमा सहभागि भएका थिए ।
अखिल क्रान्तिकारीका कास्की जिल्ला उपाध्यक्ष सुमन सुवेदीले सरकारी गाडीको दुरुपयोग गरेका कारण आफुहरुले नियन्त्रणमा लिएर प्रहरीलाई चाबि बुझाएको बताए ।
उनले कुनैपनि बहानामा व्यक्तिगत कामका लागि सरकारी गाडी प्रयोग गर्न नपाउने बताए । उनले व्यक्तिगत साधन प्रयोग गर्न अनुरोध गरे ।
क्रान्तिकारीका केन्द्रिय सदस्य सुजन सापकोटाले भ्रष्ट आचरण जति सबै भ्रष्टचार भएको बताए । सरकारी सम्पत्तिको दोहन भएको उनले बताए । काम विशेषले नभई विवाहकै लागि यसरी आउनु गलत रहेको बताए ।
उता निर्देशक उपाध्यायले भने आफुहरु बाटो परेका कारण पसेको बताए । आफुहरु पोखरा पुगेर आएको बताए । तर सोही कार्यालयका एक कर्मचारीले भने उनीहरु विवाहकै लागि आएको बताए ।
“यहाँबाट दुई वटा गाडी गएको थियो । त्यहाँ एउटामात्रै पुगेको भन्ने सुनियो । यो भन्दा अघि पनि विवाहका लागि खसी बोक्ने काम गरेको थियो” कर्मचारीले भने,“यो भन्दा अघि पनि यहि कार्यालयको गाडी दुरुपयोग गरेकै कारण एक हप्तासम्म चाबि थुतेको थियो । अहिले पनि सोही गल्ति दोहोरियो ।” निर्देशक उपाध्यायले भने, आफुले गल्ति गरेको स्विकार गर्दै एक पटकलाई छाडिदिन आग्रह गरेका थिए ।
तर विद्यार्थी संगठनले भने ट्राफिक नियमअनुसार कारवाहि गर्नका लागि प्रहरीलाई बुझाएको हो ।
प्रतिक्रिया लेख्नुहोस्:-